Munin Barkataki Biography | মুনীন বৰকটকীৰ জীৱনী 

মুনীন বৰকটকী (Munin Barkataki) বিংশ শতাব্দীৰ অসম সাহিত্যক্ষেত্ৰৰ এজন জ্ঞাতপৰিচিত সাহিত্যিক আৰু সমালোচক। গল্প, কবিতা আৰু নানা ধৰণৰ ৰচনা তেওঁ লিখিছে যদিও সাহিত্যিক সমাজত তেওঁৰ পৰিচয় মূলত এজন কৃতী সমালোচক হিচাপে অধিক দৃঢ়। তেওঁ দেশৰ বিভিন্ন আঞ্চলিক আৰু ৰাষ্ট্ৰীয় সংবাদপত্ৰত নিয়মিতভাৱে লিখা-লিখি কৰিছিল। চৰকাৰী চাকৰিত থাকোতে তেওঁ কেন্দ্ৰীয় তথ্য আৰু প্ৰসাৰণ মন্ত্ৰালয়ৰ অধীনত উচ্চ পদত কাৰ্য নিৰ্বাহ কৰিছিল আৰু ১৯৬৫ৰ পৰা ১৯৭০ চনৰ ভিতৰত প্ৰেছ ইনফৰমেশ্যন বুৰ’ আৰু আকাশবাণীৰ সংবাদ সঞ্চালক হিচাপেও কৰ্মৰত আছিল।

চৰকাৰী সেৱাৰ পৰা অৱসৰ গ্ৰহণ কৰাৰ পিছত গুৱাহাটী বিশ্ববিদ্যালয়ৰ সাংবাদিকতা বিভাগত অধ্যাপক হিচাপে যোগদান কৰে। শৈক্ষিক জীৱনতো তেওঁ অসাধাৰণ কৃতিত্বৰ নিদৰ্শন ৰাখিছিল—বি.এ পৰীক্ষাত প্ৰথম বিভাগত ডিষ্টিংচনসহ উত্তীৰ্ণ হৈ, তাৰ পিছত কলিকতা বিশ্ববিদ্যালয়ৰ পৰা স্বৰ্ণপদক লাভ কৰিছিল।

• জন্ম: ১৯১৫ চন, যোৰহাট
  
• মৃত্যু: ৬ নৱেম্বৰ, ১৯৯৩, গুৱাহাটী
  
• বাসগৃহ: পঞ্চৱতী, গুৱাহাটী
  
• ৰাষ্ট্ৰীয়তা: ভাৰতীয়
  
• নাগৰিকত্ব: ভাৰত
  
• পেচা: লেখক, সমালোচক
  
• বিশেষভাবে জনাজাত: সমালোচক হিচাপে
  
• গৃহস্থান: তৰাজান, যোৰহাট
  
• ধৰ্ম: হিন্দু
  
• পত্নী: ৰেণুকা দেৱী বৰকটকী
  
• পিতৃ: ৰায়চাহেব দুৰ্গাধৰ বৰকটকী
  
• মাতৃ: কমলিনী দেৱী
  
• সন্তান: মিনাক্ষী বৰকটকী

Read also: Chandraprabha Saikiani Biography | চন্দ্ৰপ্ৰভা শইকীয়ানীৰ জীৱনী: অসমীয়া সমাজৰ এগৰাকী দীপ্তিময় নাৰী

মুনীন বৰকটকী (Munin Barkataki) ৰ জন্ম আৰু পৰিয়াল

মুনীন বৰকটকীৰ জন্ম ১৯১৫ চনৰ কাতি বিহুৰ দিনা যোৰহাট জিলাৰ তৰাজানত হৈছিল। তেখেতৰ দেউতাক ৰায়চাহেব দুৰ্গাধৰ বৰকটকী ব্রিটিছ শাসনকালত অসমৰ বিদ্যালয়সমূহৰ সংমণ্ডল পৰিদৰ্শক আছিল। গোৱালপাৰাৰ বিদ্যালয়সমূহত অসমীয়া ভাষা প্ৰচলনৰ ক্ষেত্ৰত দেউতাকে বিশেষ ভূমিকা গ্ৰহণ কৰিছিল। মাতৃ কমলিনী দেৱী পদ্মাৱতী দেৱী ফুকননীৰ দুহিতা আছিল। আনন্দৰাম ঢেকিয়াল ফুকন আছিল তেখেতৰ আজোককাক।

সাহিত্যিক আৰু প্ৰশাসনিক বিষয়া সত্যেন বৰকটকী আছিল মুনীন বৰকটকীৰ জেষ্ঠ ভাতৃ। দুগৰাকী ভগ্নীৰ নাম প্ৰেমলতা আৰু প্ৰীতিলতা। ১৯৫৯ চনত মুনীন বৰকটকীয়ে ৰেণুকা দেৱী বৰকটকীৰ সৈতে বিবাহ বন্ধনত আবদ্ধ হয়। তেওঁলোকৰ কন্যা মীনাক্ষী দেৱী বৰকটকী।

মুনীন বৰকটকী (Munin Barkataki) ৰ শিক্ষা জীৱন 

মুনীন বৰকটকীৰ প্ৰাথমিক শিক্ষা আৰম্ভ হয় যোৰহাট প্ৰেকটিচিং স্কুলত। তাৰ পিছত দেউতাকৰ সৈতে তেখেত কলিকতা লৈ গ’লে আৰু সপ্তমমানলৈ তাত অধ্যয়ন কৰে। অষ্টম মানৰ পৰা পুনৰ যোৰহাট চৰকাৰী হাইস্কুলত পঢ়ি প্ৰৱেশিকা পৰীক্ষাত প্ৰথম বিভাগত উত্তীৰ্ণ হয়।

প্ৰৱেশিকা উত্তীৰ্ণ হোৱাৰ পিছত নতুনকৈ স্থাপিত জগন্নাথ বৰুৱা মহাবিদ্যালয়ত অধ্যয়ন কৰি ইণ্টাৰমেডিয়েট পৰীক্ষাত সাফল্য অৰ্জন কৰে। ১৯৩৮ চনত কলিকতা বিশ্ববিদ্যালয়ৰ অধীনত ডিষ্টিংচনসহ প্ৰথম স্থান অধিকার কৰি প্ৰভাত কুমাৰ স্বৰ্ণপদক লাভ কৰে। যদিও তেখেতে ঢাকা বিশ্ববিদ্যালয়ত এম.এ. পাঠ্যক্ৰমত নাম ভৰ্তি কৰিছিল, সম্পূৰ্ণ কৰিবলৈ সক্ষম হোৱা নাছিল।

মুনীন বৰকটকী (Munin Barkataki) ৰ কৰ্মজীৱন

মুনীন বৰকটকীৰ কৰ্মজীৱনৰ আৰম্ভণি হৈছিল শিক্ষকতাৰে। প্ৰথমে যোৰহাটৰ তিনিখন উচ্চ ইংৰাজী বিদ্যালয়ত প্ৰায় দুবছৰ তেওঁ শিক্ষকতা কৰিছিল। তাৰ পিছত নাগালেণ্ডৰ মোককচাঙতো তেওঁ শিক্ষকৰ পদত থাকিছিল। তেখেতৰ বহু প্ৰসিদ্ধ শিষ্যৰ ভিতৰত কবি অমূল্য বৰুৱা, অজিতকুমাৰ শৰ্মা, পদুম বৰুৱা আদি অন্তর্ভুক্ত।

সাংবাদিকতা আৰু সাহিত্য

শিক্ষকতাৰ পাছত বৰকটকীয়ে সংবাদপত্ৰৰ জগতলৈ পাতনি মেলে।

সংবাদপত্ৰ সম্পাদনা

• ১৯৩৫ চনত যোৰহাটৰ পৰা প্ৰকাশিত দৈনিক বাতৰি কাকতৰ সৈতে তেওঁ জড়িত হয়।
  
• ১৯৩৯ চনত মাধৱ বেজবৰুৱাৰ সম্পাদনাধীন বাঁহীত সহযোগী সম্পাদক ৰূপে যোগদান কৰে।
  
• ১৯৮৬-৮৮ চনৰ ভিতৰত শ্বিলঙৰ কেন্দ্ৰীয় সামৰিক বিভাগৰ ত্ৰিভাষিক সাপ্তাহিকৰ সহকাৰী সম্পাদক হিচাপে কৰ্মৰত থাকে।
  
• দৈনিক অসমীয়া আৰু আসাম ট্ৰিবিউন কাকতৰো তেওঁ সহকাৰী সম্পাদক আছিল।
  

নাট্য সমালোচনা

নাট্যসমালোচক হিচাপেও তেওঁৰ বিশেষ খ্যাতি আছিল। ভ্ৰাম্যমাণ নাট্য গোষ্ঠীৰ নাটকৰ উপৰি শৌভিক, প্ৰগতিশীল শিল্পী সংঘ, কামৰূপ নাট্যসংঘ আদি নাট্যদলৰ অভিনয়ৰ সাৰ্থক সমালোচনা কৰিছিল। লগতে জাহ্নু বৰুৱাৰ চিনেমা আৰু কেইখনমান তথ্যচিত্ৰ সম্পৰ্কেও সমীক্ষা আগবঢ়াইছিল।

চৰকাৰী সেৱা

প্ৰচাৰ বিভাগত কৰ্মকাল

১৯৪৮ চনৰ পৰা ১৯৫৫ চনলৈ তেওঁ অসম চৰকাৰৰ গাঁও উন্নয়ন আৰু পৰিকল্পনা বিভাগত প্ৰচাৰ বিষয়া হিচাপে কৰ্মৰত আছিল। তাৰ পিছত প্ৰচাৰ বিভাগৰ সম্পাদক আৰু উপ-সঞ্চালক পদত নিযুক্ত হয়।

ভাৰত চৰকাৰত কৰ্মকাল

পিছলৈ তেওঁ ভাৰত চৰকাৰৰ প্ৰেছ ইনফৰমেচন ব্যুৰোৰ তথ্য অধিকাৰী হিচাপে কৰ্ম কৰিছিল। ১৯৭০ চনত অল ইণ্ডিয়া ৰেডিঅ’ৰ বাৰ্তা সম্পাদক হিচাপে অৱসৰ গ্ৰহণ কৰে।

অৱসৰৰ পিছৰ জীৱন

অৱসৰৰ পিছতো তেওঁ শিক্ষাৰ জগতৰ পৰা আঁতৰি নাযায়। গুৱাহাটী বিশ্ববিদ্যালয়ৰ সাংবাদিকতা বিভাগত কেইবছৰমান অধ্যাপনা কৰি নিজৰ অভিজ্ঞতা নতুন প্ৰজন্মলৈ প্ৰদান কৰিছিল।

স্বীকৃতি আৰু বঁটা

মুনীন বৰকটকীৰ (Munin Barkataki) সাহিত্যৰ মূল্যায়ন স্বৰূপে ১৯৮৩ চনত অসম প্ৰকাশন পৰিষদ বঁটা তেখেতক প্ৰদান কৰা হয়। এই বঁটাই তেওঁৰ সাহিত্যিক জীৱনৰ অগ্ৰগতি আৰু অবদানক শ্ৰদ্ধা জ্ঞাপন কৰে।

মৃত্যু আৰু স্মৃতি

১৯৯৩ চনৰ ৬ নৱেম্বৰ তাৰিখে মুনীন বৰকটকী (Munin Barkataki) জীৱনৰ অন্তিম যাত্ৰা কৰে। তেওঁৰ মৃত্যুৰ পিছত ১৯৯৪ চনত মুনীন বৰকটকী স্মাৰক ন্যাস গঠন কৰা হয়। এই ন্যাসে ১৯৯৫ চনৰ পৰা প্ৰতিবছৰে চল্লিশ বছৰৰ তলৰ প্ৰতিভাশালী অসমীয়া সাহিত্যিকক মুনীন বৰকটকী বঁটা প্ৰদান কৰি আহিছে। ইয়াৰ দ্বাৰা তেখেতৰ নাম, কীৰ্তি আৰু সাহিত্য সৃষ্টিৰ অনুপ্ৰেৰণা চিৰদিন বাচি থাকিব।

উপসংহাৰ

মুনীন বৰকটকী (Munin Barkataki) কেৱল এজন সাহিত্যিক নহয়, তেওঁ অসমীয়া সাহিত্যৰ আধুনিক গদ্য-সমালোচনাৰ ভিত মজবুত কৰি থৈ গৈছিল। তেওঁৰ কলমে নতুন প্ৰজন্মক সাহিত্যৰ প্ৰতি অনুপ্ৰাণিত কৰিছে। মৃত্যুৰ পিছতো তেওঁৰ নামত প্ৰদান কৰা মুনীন বৰকটকী বঁটা সাহিত্যক্ষেত্ৰত উদীয়মান প্ৰতিভা উন্মোচনত এক গুৰুত্বপূর্ণ ভূমিকা পালন কৰি আহিছে।

FAQs 

1. মুনীন বৰকটকী কোন আছিল?
উত্তৰ: মুনীন বৰকটকী এজন অসমীয়া সমালোচক আৰু প্ৰবন্ধকাৰ আছিল।

2. মুনীন বৰকটকী কিহৰ বাবে খ্যাত?
উত্তৰ: মুনীন বৰকটকী সাহিত্য সমালোচনা আৰু প্ৰবন্ধৰ দ্বাৰা খ্যাত।

3. মুনীন বৰকটকীয়ে কি বঁটা লাভ কৰিছিল?
উত্তৰ: ১৯৮৩ চনত তেওঁ অসম প্ৰকাশন পৰিষদ বঁটা লাভ কৰিছিল।

4. মুনীন বৰকটকী কেতিয়া মৃত্যু বৰণ কৰে?
উত্তৰ: তেওঁ ১৯৯৩ চনৰ ৬ নৱেম্বৰত মৃত্যুবৰণ কৰে।

Q5. মুনীন বৰকটকীৰ নামত কি বঁটা প্ৰদান কৰা হয়?
উত্তৰ: ১৯৯৫ চনৰ পৰা প্ৰতিবছৰে “মুনীন বৰকটকী বঁটা” প্ৰদান কৰা হয়।