Amulya Barua Biography | অমূল্য বৰুৱাৰ জীৱনী 

অমূল্য বৰুৱা (Amulya Barua) আছিল অসমীয়া সাহিত্যৰ জগতত এক উজ্জ্বল জ্যোতিষ্ক, যিয়ে নিজৰ কবিতাৰ মাজেৰে সময়ৰ স্পন্দন ধৰি ৰাখিবলৈ চেষ্টা কৰিছিল। তেওঁক “কালান্তৰৰ কবি” বুলি অভিহিত কৰা হয়, কিয়নো তেওঁৰ কবিতাত এক দীপ্তিময় চিন্তাধাৰা আৰু সমাজৰ প্ৰতি এক জাগ্ৰত সঁহাৰি প্রতিফলিত হৈ পৰিছিল। ছাত্ৰ অৱস্থাতেই সাহিত্যক্ষেত্ৰত পদাৰ্পণ কৰি তেওঁ অসমীয়া কাব্য সাহিত্যলৈ এক নতুন দিশ প্ৰদান কৰিছিল। তেওঁৰ কবিতাসমূহত দেখা যায় এক গভীৰ উপলব্ধি, সমাজত চলি থকা অন্যায়, বৈষম্য, শোষণৰ বিৰুদ্ধে গৰ্জি উঠা কণ্ঠ। গতানুগতিক সাহিত্যিক ধাৰাৰ পৰা আঁতৰি গৈ, অমূল্য বৰুৱাই এক সৃষ্টিশীল বিদ্ৰোহৰ মাধ্যমেৰে সাহিত্যক সমাজ-সচেতন দিশলৈ লৈ যাবলৈ চেষ্টা কৰিছিল।

জন্ম: ৩০ জুন, ১৯২২ — যোৰহাট, অসম

মৃত্যু: ১৮ আগষ্ট, ১৯৪৬ — কলকাতা (বয়স: ২৪ বছৰ)

ৰাষ্ট্ৰীয়তা: ভাৰতীয়

শিক্ষা: কলকাতা বিশ্ববিদ্যালয়

অমূল্য বৰুৱা (Amulya Barua) ৰ জন্ম আৰু প্ৰাৰম্ভিক জীৱন

জন্ম আৰু পৰিয়ালিক পটভূমি

অমূল্য বৰুৱাৰ জন্ম ১৯২২ চনৰ ৩০ জুন তাৰিখে যোৰহাট জিলাৰ এটা সাধাৰণ মধ্যবিত্ত পৰিয়ালত হৈছিল। তেওঁৰ পিতৃ আছিল প্ৰমোদ বৰুৱা, যি গড়কাপ্টানী বিভাগত কাৰ্যৰত আছিল। মাকৰ নাম আছিল ৰেৱতী বৰুৱা। অমূল্য বৰুৱা আছিল ছয় ভাই-ভনীৰ মাজত সৰ্বজ্যেষ্ঠ। তেওঁৰ অন্যান্য ভাই-ভনীসকল হ’ল – সৰোজ বৰুৱা, লাবণ্য দাস, ৰেণু বৰুৱা, অনিল বৰুৱা আৰু অমল বৰুৱা।

বিদ্যালয় জীৱন আৰু সাহিত্যৰ প্ৰতি উৎসাহ

তেওঁৰ প্ৰাৰম্ভিক শিক্ষা যোৰহাটতেই আৰম্ভ হৈছিল। তেওঁ পঢ়া কালত যিসকল গুণী শিক্ষকক পালে, তেতিয়াৰ ভিতৰত উল্লেখযোগ্য হ’ল– ডিম্বেশ্বৰ নেওগ, মিত্ৰদেৱ মহন্ত, জেহিৰুদ্দিন আহমেদ, লক্ষ্মীনাথ ফুকন আৰু তাৰানাথ বৰপুজাৰী। এই শিক্ষকৰ সাহচৰ্য আৰু উৎসাহে তেওঁক সাহিত্যৰ ক্ষেত্ৰলৈ আকৰ্ষিত কৰিলে। তেওঁ তেতিয়াৰ বন্ধুবৰ্গৰ সৈতে সাহিত্য আলোচনা, পঢ়া-লিখা আদিত নিজকে ব্যস্ত কৰি তোলে।

সহপাঠী আৰু সমাজৰ উজ্জ্বল নক্ষত্র

বিদ্যালয় জীবনৰ সময়ত তেওঁ বহু বিশিষ্ট ব্যক্তিৰ সৈতে সহপাঠী আছিল। তেনে কেইজনমান সহপাঠী হ’ল– ৰাজেন হাজৰিকা, যতি নাৰায়ণ শৰ্মা, পদুম বৰুৱা, বীৰেন্দ্ৰ কুমাৰ ভট্টাচাৰ্য্য, আব্দুছ ছাত্তাৰ, নলীন বৰুৱা, পদ্ম বৰকটকী আৰু ভদ্ৰেশ্বৰ হাজৰিকা। এইসকলেই পৰৱৰ্তী সময়ত সমাজৰ বিভিন্ন ক্ষেত্ৰত গুৰুত্বপূৰ্ণ অৱদান আগবঢ়াই দেশ আৰু সমাজত নাম উজলালে।

বিদ্যালয় স্থানান্তৰ আৰু উচ্চ শিক্ষাৰ আৰম্ভণি

১৯৩৩ চনত অমূল্য বৰুৱাই যোৰহাট চৰকাৰী হাইস্কুলত প্ৰথমবাৰ নামভৰ্তি কৰিছিল। কিন্তু তেওঁৰ পিতৃৰ গোলাঘাটলৈ বদলিৰ বাবে তেওঁকো সোঁহাতত লৈ গৈ, গোলাঘাটৰ বিদ্যালয়ত পঞ্চম শ্ৰেণীত পুনৰ নামভৰ্তি কৰোৱা হয়। ১৯৩৭ চনত পুনৰ যোৰহাটলৈ ঘূৰি আহি ষষ্ঠ শ্ৰেণীত পুনৰ ভৰ্তি হয়।

১৯৪১ চনত তেওঁ যোৰহাট চৰকাৰী উচ্চতৰ মাধ্যমিক আৰু বহুমুখী বিদ্যালয়ৰ পৰা মেট্ৰিক পৰীক্ষা উত্তীৰ্ণ হয়। তাৰ পিছতে কটন কলেজত বিজ্ঞান শাখাত ভৰ্তি হয় যদিও আৰ্থিক অসুবিধাৰ বাবে কটন কলেজ এৰি যোৰহাটৰ জগন্নাথ বৰুৱা মহাবিদ্যালয়ৰ কলা শাখালৈ স্থানান্তৰ হয়।

স্বাধীনতা আন্দোলনত অংশগ্ৰহণ

বি.এ. পাঠকালত অমূল্য বৰুৱা ভাৰতৰ স্বাধীনতা আন্দোলনৰ প্ৰতি আকৃষ্ট হয়। তেতিয়া তেওঁ ‘ব্লেকড্ৰেগন’ নামৰ উগ্ৰপন্থী দলে যোগদান কৰিছিল। এই দলটোৱে তৎকালীন ইংৰাজ শাসনৰ বিৰুদ্ধে সেনা ছাউনীত জুই দিয়াৰ দৰে কাৰ্যকলাপ চলাইছিল।

উচ্চ শিক্ষাৰ বাবে কলিকতা গমন

১৯৪৫ চনত তেওঁ স্নাতক ডিগ্ৰী লাভ কৰি ইংৰাজী বিষয়ত এম.এ. আৰু আইন অধ্যয়নৰ বাবে কলিকতা অভিমুখে গমন কৰে। কলিকতাত থাকোঁতে তেওঁ বিভিন্ন বাঙালি সাহিত্যিক, শিল্পী তথা চিন্তাশীল ব্যক্তিসকলৰ সংস্পৰ্শলৈ আহে, যাৰ দ্বাৰা তেওঁৰ চিন্তাধাৰা আৰু সাহিত্য অনুপ্ৰেৰণা অধিক গভীৰ আৰু প্ৰশস্ত হয়।

অমূল্য বৰুৱা (Amulya Barua) ৰ সাহিত্যিক জীৱনৰ আৰম্ভণি

অমূল্য বৰুৱাৰ সাহিত্যিক যাত্ৰাৰ সূচনা ১৯৩৯ চনত, যেতিয়া তেওঁ কলিকতাৰ পৰা প্ৰকাশিত ‘আৱাহন’ আলোচনীৰ বাবে কবিতা লিখিবলৈ অনুপ্ৰেৰণা লাভ কৰে। দ্বিতীয় বিশ্বযুদ্ধৰ ভয়ংকৰ সময়ছোৱাৰ মাজতো তেওঁ আৰু তেওঁৰ সহচৰসকলে সাহিত্য আৰু সংস্কৃতিৰ চর্চা অব্যাহত ৰাখিছিল।

 ‘ৰ’দালি সভা’ আৰু সম্পাদনাৰ ভূমিকা

এই সময়তে তেওঁ ‘ৰ’দালি সভা’ নামে এখন সাহিত্য সভা গঠন কৰে, যাৰ দায়িত্ব লয় সাহিত্যিক কমলেশ্বৰ চলিহাই। অমূল্য বৰুৱাই এই সভাৰ অধীনত প্ৰকাশিত আলোচনীখনৰ সম্পাদক হিচাপে ‘যোগসূত্ৰ’ নামৰ এটা বিপ্লৱী কবিতা লিখে। ইয়াৰ উপৰিও, কলেজীয়া সময়ছোৱাত তেওঁ কলেজ আলোচনীৰ ইংৰাজী বিভাগ সম্পাদনা কৰিছিল আৰু ‘Mockery of Civilisation’ শীৰ্ষক বিপ্লৱী মনোভাৱৰ কবিতা এখন লিখে, যি পিছত বোম্বাইৰ পৰা প্ৰকাশিত ‘ত্ৰিবেণী’ (Tribeni) ইংৰাজী আলোচনীত স্থান পায়।

অমূল্য বৰুৱা (Amulya Barua) ৰ কবিতাৰ ধাৰা: ৰোমাণ্টিকতা পৰা প্ৰগতিবাদলৈ

অন্য বহু অসমীয়া কবিৰ দৰে, অমূল্য বৰুৱাৰ কবিতা যাত্ৰা ৰোমাণ্টিক ভাৱনাৰে আৰম্ভ হৈছিল। কিন্তু সময়ৰ পৰিৱৰ্তনৰ সৈতে—বিশেষকৈ দ্বিতীয় বিশ্বযুদ্ধৰ বিভীষিকা, ভাৰতৰ স্বাধীনতা আন্দোলনৰ উত্তাল বতাহ, ৰুছ সমাজবাদ আৰু মাৰ্ক্সীয় দৰ্শনৰ প্ৰভাৱত তেওঁ বাস্তৱমুখী আৰু প্ৰগতিশীল সাহিত্যৰ প্ৰতি আকৰ্ষিত হয়।

নিপীড়িতৰ কন্ঠস্বৰ

সমাজৰ দুখী, নিপীড়িত, উপেক্ষিত শ্রেণীৰ বাবে কলম ধৰি তেওঁ এগৰাকী মানৱতাবাদী কবিৰ ৰূপত আত্মপ্রকাশ কৰে। ‘জয়ন্তী’ আলোচনীখনৰ পাতত তেখেতে আধুনিক চিন্তাধাৰাৰ আধাৰত অসমীয়া কবিতালৈ এটা নতুন ধাৰা আনিবলৈ সক্ষম হয়। কিয়নো, কুকুৰ, বেশ্যা, বিপ্লৱী, আন্ধাৰৰ হাহাকাৰ, মুক্তিগান, ভাৰতীৰ মুক্তিস্বপ্ন, সিহঁত তেতিয়া জীৱ, আজিৰ বিহু আদি কবিতাবোৰে তেওঁৰ সমাজসচেতন দৃষ্টিভংগীক প্ৰতিফলিত কৰে।

কবিতা পুথি ‘অচিনা’

তেখেতৰ মৃত্যুৰ পিছত প্ৰকাশ পোৱা ‘অচিনা’ (১৯৭৬) হ’ল তেওঁৰ একমাত্ৰ কবিতা সংকলন, যি তেওঁৰ সাহিত্যিক অৱদানৰ এক অমূল্য নিদৰ্শন ৰূপে গণ্য হয়।

অমূল্য বৰুৱাৰ সাহিত্যিক যাত্ৰা আছিল উত্তাল সময়ৰ এক প্রতিবিম্ব, য’ত তেখেতে কল্পনাৰ ৰূপত নহয়, বাস্তৱৰ জ্বলন্ত প্রশ্নবোৰ লৈ কবিতা ৰচনাৰ সাহস দেখুৱাইছিল। তেওঁৰ কলম আছিল শোষিতৰ ভাষা আৰু সমাজ পৰিৱর্তনৰ হাতিয়াৰ।

অমূল্য বৰুৱা (Amulya Barua) ৰ অপমৃত্যুৰ হৃদয়বিদাৰক ঘটনা

১৮ আগষ্ট, ১৯৪৬ তাৰিখে, অমূল্য বৰুৱাই কলিকতাৰ ৰাজাবাহাৰৰ বিশ্ববিদ্যালয়ৰ ছাত্ৰাৱাসত সাম্প্ৰদায়িক দাংগিৰ বলি হৈ কৰুণ মৃত্যু বৰণ কৰে। মৃত্যুৰ সময়ত তেওঁৰ বয়স মাত্ৰ ২৪ বছৰ ১ মাহ ১৮ দিন আছিল। সেইদিনা পুলিচ ভেনে অসমলৈ ৰওনা হ’ব লগা ছাত্ৰসকলক ৰেল ষ্টেশ্যনলৈ লৈ যাবলৈ আহিছিল। অমূল্য বৰুৱাও সেই ভেনত উঠিছিল। কিন্তু তেখেতে জৱাহৰলাল নেহৰুৰ “Glimpses of the World History” কিতাপখনৰ অনুবাদ চলি থকাৰ বাবে, ইতিমধ্যে অনুবাদ কৰা অংশৰ পাণ্ডুলিপি আৰু মূল কিতাপখন আনি ল’বলৈ পুনৰ ছাত্ৰাৱাসলৈ উভতি যায়।

এই সময়তে দুস্কৃতিকাৰীয়ে ছাত্ৰাৱাসত আক্ৰমণ চলায়। সেই আক্ৰমণৰ বলিত পৰি অমূল্য বৰুৱাই প্ৰাণ হেৰুৱায়। তেওঁলোকৰ পৰা তেখেতৰ মৃতদেহো উদ্ধাৰ কৰা নহ’ল। ফলস্বৰূপে, পৰিয়ালৰ লোকসকলে বহুদিন পৰ্যন্ত তেওঁৰ ঘূৰি অহাৰ আশাত অপেক্ষা কৰিছিল।

উপসংহাৰ 

অমূল্য বৰুৱা আছিল অসমৰ সাহিত্যৰ অন্যতম সাহিত্যিক। মাত্ৰ ২৪ বছৰৰ জীৱনত তেওঁৰ সাহিত্য সাধনাই অসমীয়া কবিতালৈ নতুন বাট দেখুৱাইছে। সমাজসচেতনতা, বিদ্ৰোহ, মানৱতাৰ সুৰেৰে তেখেতে নিজৰ কবিতাক শাশ্বত কৰি তুলিছিল। অমূল্য বৰুৱাৰ অপমৃত্যু সকলোৰে বাবে এক অপূৰণীয় ক্ষতি, কিন্তু তেওঁৰ চিন্তাধাৰা আৰু সাহিত্যকর্ম আজিও যুগে যুগে প্ৰেৰণাৰ উৎস হৈ ৰৈ আছে।

Read also: Hiteswar Borboruah Biography | হিতেশ্বৰ বৰবৰুৱাৰ জীৱনী 

FAQs 

1. অমূল্য বৰুৱাৰ জন্ম কেতিয়া হৈছিল?

উত্তৰ: অমূল্য বৰুৱাৰ জন্ম ১৯২২ চনৰ ৩০ জুন তাৰিখে হৈছিল।

2. অমূল্য বৰুৱাক কিয় “কালান্তৰৰ কবি” বুলি কোৱা হয়?

উত্তৰ: তেওঁৰ কবিতাত সমাজৰ প্ৰতি জাগ্ৰত সঁহাৰি আৰু দীপ্তিময় চিন্তাধাৰা প্ৰতিফলিত হোৱা বাবে তেওঁক “কালান্তৰৰ কবি” বুলি কোৱা হয়।

3. অমূল্য বৰুৱাৰ একমাত্ৰ কবিতা সংকলন কি?

উত্তৰ: ‘অচিনা’ (১৯৭৬) হৈছে অমূল্য বৰুৱাৰ একমাত্ৰ কবিতা সংকলন।

4. অমূল্য বৰুৱা কোন আলোচনীৰ সম্পাদক আছিল?

উত্তৰ: তেওঁ ‘ৰ’দালি সভা’ৰ অধীনত প্ৰকাশিত আলোচনীৰ সম্পাদক আছিল।

5. অমূল্য বৰুৱাৰ মৃত্যু কেনেকৈ ঘটিছিল?

উত্তৰ: ১৯৪৬ চনৰ ১৮ আগষ্টত, কলিকতাৰ ছাত্ৰাৱাসত সাম্প্ৰদায়িক দাংগিৰ বলি হৈ তেওঁ কৰুণভাৱে মৃত্যুবৰণ কৰে।

6. অমূল্য বৰুৱাই কেনেকুৱা কবিতা লিখিছিল?

উত্তৰ: তেওঁৰ কবিতা সমাজসচেতন, বিদ্ৰোহাত্মক, আৰু নিপীড়িতজনৰ কণ্ঠস্বৰ ৰূপে পৰিগণিত।