কালিৰাম মেধি (Kaliram Medhi) আছিল এজন বিশিষ্ট অসমীয়া সাহিত্যিক আৰু ব্যাকৰণিক। অসমীয়া পৌৰাণিক সাহিত্যৰ বৈজ্ঞানিক পৰ্যালোচনাৰ ক্ষেত্ৰত তেওঁ পথপ্ৰদৰ্শকৰ ভূমিকা পালন কৰিছিল। ১৯২৩ চনত তেখেতে হেম সৰস্বতীৰ ‘প্ৰহ্লাদ চৰিত’ কাব্যখন সম্পাদনা কৰি প্ৰকাশ কৰিছিল, যাৰ বাবে তেওঁৰ পাণ্ডিত্য আৰু গৱেষণাকৌশল বিশেষভাৱে প্ৰশংসিত হয়। তেখেত ১৯০২ চনত ‘বিষ্ণুপ্ৰিয়া দেৱী পুৰস্কাৰ’ আৰু ১৯৪৬ চনত ‘ৰায়বাহাদুৰ অব আছাম’ খিতাপ লাভ কৰিছিল। লগতে ১৯৪৩ চনত তেওঁৰ সাহিত্যিক অৱদানৰ স্বীকৃতি স্বৰূপে ‘তত্ত্বনিধি’ উপাধিৰে সন্মানিত কৰা হয়।
- জন্ম: ১৮ অক্টোবৰ, ১৮৮০, ৰামদিয়া গাঁও, কামৰূপ, অসম
- মৃত্যু: ২৪ জানুৱাৰী, ১৯৫৪
- পেচা: সাহিত্যিক, ব্যাকৰণিক
- ভাষা: অসমীয়া
- ৰাষ্ট্ৰীয়তা: ভাৰতীয়
- নাগৰিকত্ব: ভাৰত
- শিক্ষা: স্নাতকোত্তৰ
- উল্লেখযোগ্য বঁটা:
বিষ্ণুপ্ৰিয়া দেৱী পুৰস্কাৰ (১৯০২)
ৰায়বাহাদুৰ অব আছাম (১৯৪৬)
- উপাধি: তত্ত্বনিধি (১৯৪৩)
- দাম্পত্যসংগী: স্বৰ্ণলতা ভূঞা
- সন্তান: সৌৰভ কুমাৰ চলিহা
কালিৰাম মেধি (Kaliram Medhi) ৰ জন্ম আৰু শিক্ষাজীৱন
অসমৰ কামৰূপ জিলাৰ ৰামদিয়া গাঁৱত ১৮৮০ চনৰ ১৮ অক্টোবৰত জন্মগ্ৰহণ কৰে কালিৰাম মেধিয়ে। তেওঁ এজন সাধাৰণ পৰিয়ালৰ সন্তান আছিল। তেওঁৰ পিতৃ ভূকলি মেধি আৰু মাতৃ সোণতৰা মেধি আছিল। শৈশৱৰ পৰাই মেধি ডাঙৰীয়াৰ মনত জ্ঞান-বিজ্ঞানৰ প্ৰতি এক অপাৰ আকর্ষণ আছিল। জীৱনৰ আৰম্ভণিত বহুতো বৈচিত্র্যৰ সন্মুখীন হোৱাৰ পাছতো তেওঁ শিক্ষাৰ ক্ষেত্ৰত অব্যাহত ৰাখিছিল নিজৰ যাত্ৰা।
তেওঁ প্ৰথমে নিজৰ গাঁৱৰ এটা উচ্চ প্ৰাইমাৰী বিদ্যালয়ত পঢ়া আৰম্ভ কৰে। সেই সময়ত এই বিদ্যালয়খনক ‘ছাত্ৰঘৰ’ নামে জনা গৈছিল। ১৮৯১ চনত তেওঁ গুৱাহাটী চৰকাৰী উচ্চ মাধ্যমিক বিদ্যালয়ত ভৰ্তি হয় আৰু ১৮৯৭ চনত সংস্কৃত বিষয়ত প্ৰথম স্থান অধিকাৰ কৰি এণ্ট্ৰেঞ্চ পৰীক্ষাত উত্তীৰ্ণ হয়। তাৰ পাছত উচ্চ শিক্ষাৰ বাবে তেওঁ গৈছিল কলিকতা চিটি কলেজলৈ। সেই সময়ত বহু অসমীয়া শিক্ষাৰ্থীয়ে তাত শিক্ষালাভ কৰিবলৈ নেপায়। তথাপি, কালিৰাম মেধিয়ে ১৮৯৯ চনত এফ.এ. পরীক্ষাত প্ৰথম বিভাগত উত্তীৰ্ণ হৈ অসাধাৰণ কৃতিত্বৰ পৰিচয় দিয়ে।
তেওঁ তাতেই থমকি নৰহি ১৯০২ চনত কলিকতা বিশ্ববিদ্যালয়ৰ পৰা পদাৰ্থ বিজ্ঞানত স্নাতকোত্তৰ উপাধি লাভ কৰে আৰু সোণৰ পদক লাভ কৰে। উল্লেখযোগ্য যে, তেওঁ আছিল পদাৰ্থ বিজ্ঞানত এম.এ. উপাধি লাভ কৰা তৃতীয়গৰাকী অসমীয়া ব্যক্তি। তেওঁ অধ্যয়নত কেৱল কৃতিত্বই নহয়, এক আদৰ্শ মানদণ্ড প্ৰতিষ্ঠা কৰিছিল যি সময়ৰ বহুতো শিক্ষাৰ্থীৰ বাবে অনুপ্ৰেৰণা হৈ পৰিছিল।
কালিৰাম মেধি (Kaliram Medhi) ৰ কৰ্মজীৱন
শিক্ষাজীৱনৰ সফলতাৰ পাছত কালিৰাম মেধিয়ে ১৯০৪ চনত গুৱাহাটীৰ ছেটলমেণ্ট কেম্পত মাটি হাকিম হিচাপে নিজৰ চৰকাৰী কৰ্মজীৱনৰ আৰম্ভণি কৰে। পৰৱৰ্তী বছৰটোতে, অৰ্থাৎ ১৯০৫ চনত তেওঁ অসম প্ৰশাসনিক সেৱাত নিযুক্তি লাভ কৰে। চৰকাৰী দায়িত্ব পালন কৰাৰ সময়তে তেওঁ গোৱালপাৰা জিলাত কাম কৰি থকা অৱস্থাত কলা, সাহিত্য আৰু সংস্কৃতিৰ ক্ষেত্ৰতো জোৰদাৰভাৱে নিজকে সম্পৃক্ত কৰে।
প্ৰায় ৩০ বছৰৰ চৰকাৰী সেৱা সম্পূৰ্ণ কৰি তেওঁ ১৯৩৫ চনত উপায়ুক্ত (Deputy Commissioner) হিচাপে অৱসৰ গ্ৰহণ কৰে। অৱসৰৰ পাছতো তেওঁ দুবছৰ (১৯৩৬-১৯৩৮) চৰকাৰৰ বিশেষ দায়িত্বত নিযুক্ত থাকে। কালিৰাম মেধিয়ে কেৱল এটা সফল প্রশাসক হিচাপে নহয়, অসমীয়া সাহিত্যৰ ক্ষেত্ৰতো নিজৰ দৃঢ়তা প্ৰতিপন্ন কৰিছিল।
১৯১৯ চনৰ ২৬ ডিচেম্বৰত বৰপেটাত অনুষ্ঠিত হোৱা অসম সাহিত্য সভাৰ তৃতীয় অধিবেশনত তেওঁ সভাপতি হিচাপে দায়িত্ব পালন কৰিছিল। তাৰ পূৰ্বে, ১৯১৮ চনৰ দ্বিতীয় অধিবেশনত তেওঁ অভ্যৰ্থনা সমিতিৰ উপদেষ্টা হিচাপে অংশগ্ৰহণ কৰিছিল। ১৯৩৪ চনৰ মঙ্গলদৈ অধিবেশনত আনন্দচন্দ্ৰ আগৰৱালাৰ সভাপতিত্বত অনুষ্ঠিত সভাৰ মূল সংগঠক হিচাপে তেওঁ অগ্ৰণী ভূমিকা পালন কৰে। ইয়াৰ উপৰিও অনুসন্ধান সমিতি আৰু সংগ্ৰহালয় সমিতিৰ দায়িত্বও তেওঁ সুচাৰুভাৱে নিভাইছিল।
কালিৰাম মেধিৰ জীৱন আছিল সদায় সমাজ, সাহিত্য আৰু শিক্ষা উন্নয়নৰ বাবে উৎসৰ্গিত। তেওঁ একে সময়তে এগৰাকী জ্ঞানীগুণী ব্যক্তি, সাহিত্যৰ সেবক আৰু চৰকাৰী সেৱাৰ আদৰ্শ পুৰুষ হিচাপে ইতিহাসত স্মৰণীয় হৈ ৰ’ল।
কালিৰাম মেধি (Kaliram Medhi) ৰ সাহিত্যিক অৱদান আৰু ৰচনাসমূহ
কালিৰাম মেধি আছিল এগৰাকী স্বচেতনা মনোভাৱৰ চিন্তাশীল লেখক, যি ধৰ্ম, শিক্ষা, অৰ্থনৈতিক সমস্যা, আৰু সমাজ সংস্কাৰৰ ক্ষেত্ৰত মুক্ত আৰু উদাৰ দৃষ্টিভংগীৰ অধিকাৰী আছিল। ‘অসম বান্ধৱ’ আৰু ‘আলোচনী’ আদি আলোচনীসমূহত তেখেতে সমাজজীৱনৰ বিভিন্ন দিশক স্পৰ্শ কৰা বহু প্ৰবন্ধ প্ৰকাশ কৰিছিল। এই প্ৰবন্ধসমূহত তেখেতৰ ভাষাৰ গঠনশৈলী, যুক্তিবাদিতা আৰু চিন্তাৰ গভীৰতা বিশেষ ভাবে লক্ষ্যনীয়।
সাহিত্যক্ষেত্ৰত তেখেতৰ প্ৰথম গুৰুত্বপূৰ্ণ অৱদান আছিল কবি হেম সৰস্বতীৰ কাব্যৰ সমালোচনা। এই সমালোচনা পৌৰাণিক অসমীয়া সাহিত্যৰ মূল্যায়নৰ ক্ষেত্ৰত এক নতুন দিশ প্ৰদান কৰিছিল, যাক অসমীয়া সাহিত্য সমালোচনাৰ আৰম্ভণি হিচাপে গণ্য কৰা যায়।
১৯৩৬ চনত প্ৰকাশিত তেখেতৰ গুৰুত্বপূৰ্ণ গ্ৰন্থ ‘অসমীয়া ব্যাকৰণ আৰু ভাষাতত্ত্ব’ (Assamiya Byakoron aru Bhasatattva) তেখেতৰ সাহিত্যিক, ভাষাতাত্ত্বিক জ্ঞানৰ গভীৰতা আৰু অধ্যয়নশীল মনোভাৱৰ পৰিচয় দিয়ে।
পাছত কালিৰাম মেধিয়ে শ্ৰীমন্ত শংকৰদেৱৰ দৰ্শন আৰু বাণীৰ ওপৰত গুৰুত্বপূৰ্ণ গৱেষণা আগবঢ়াই ‘মহাপুৰুষ শংকৰদেৱৰ বাণী’ নামৰ গ্ৰন্থৰ সংকলন কৰে। এই গ্ৰন্থত মহাপুৰুষৰ জীৱন-দৰ্শন, আদৰ্শ আৰু শিক্ষাৰ সংগ্ৰহ দেখা পোৱা যায়।
তেখেতৰ ইংৰাজীত লিখা উল্লেখযোগ্য গ্ৰন্থ ‘Studies in the Vaishnav Literature and Culture of Assam’ ব্ৰজাবলী সাহিত্যৰ দাৰ্শনিক আৰু সাংস্কৃতিক দিশসমূহক উদ্ঘাটন কৰে। এই গ্ৰন্থখন অসমৰ বৈষ্ণৱ ধৰ্মীয় সাহিত্য আৰু সংস্কৃতিৰ এক গুৰুত্বপূৰ্ণ দলিল হিচাপে গণ্য।
আৰু এক উল্লেখযোগ্য দিশ হ’ল তেখেতৰ সম্পাদিত ‘অংকাৱলী’ নামৰ গ্ৰন্থ, যি গণিতৰ প্ৰচাৰ-প্ৰসাৰৰ ক্ষেত্ৰত এক মৌলিক অৱদান।
সাহিত্যৰ উপৰিও তেখেত ‘অসম অনুসন্ধান সমিতি’ আৰু ‘অসম ৰাজ্যিক সংগ্ৰহালয়’-ৰ সৈতে ওতপ্ৰোতভাৱে জড়িত আছিল। ১৯১৯ চনত তেখেত অসম সাহিত্য সভাৰ তৃতীয় অধিবেশনত সভাপতি হিচাপে নিৰ্বাচিত হোৱা সময়চোৱাটো তেখেতৰ সাহিত্যিক প্ৰতিপত্তি আৰু জনবিশ্বাসৰ এক প্ৰতীক আছিল।
Read also: Dr. Nagen Saikia Biography | ড° নগেন শইকীয়াৰ জীৱনী
কালিৰাম মেধি (Kaliram Medhi) ৰ গ্ৰন্থ আৰু ৰচনাসমূহঃ
অসমীয়াত লিখা গ্ৰন্থসমূহঃ
- অসমীয়া ভাষাৰ মূল (১৯১৮)
- অসমীয়া ব্যাকৰণ আৰু ভাষাতত্ত্ব (১৯৩৬)
- অংকাৱলী (১ম ভাগ)
- প্ৰহ্লাদ চৰিত্ৰ (সম্পাদিত, ১৯১৩)
- মহাপুৰুষ শংকৰদেৱৰ বাণী
- অসমীয়া প্ৰাথমিক প্ৰাকৃতিক বিজ্ঞান
- বীজগণিত
- অসমীয়া নাট
- হেলীৰ নেজাল তৰা
- গৌৰৱ
- লিখাৰ সঁজুলি
- তপ
- পৃথিৱী
- সূৰ্য
ইংৰাজীত লিখা গ্ৰন্থসমূহঃ
- The Kalitas
- Brajavali Literature of Assam
- Philosophic Aspects of the Assamese Brajavali Literature
- Origin of Assamese Drama
- Studies in the Vaishnav Literature and Culture of Assam
- Assamese Grammar and Origin of the Assamese Language
কালিৰাম মেধিৰ দেহাৱসান
১৯৫৪ চনৰ ২৪ জানুৱাৰীৰ নিশা প্ৰায় ১০ বজাত গুৱাহাটী পাণবজাৰৰ নাথান পথস্থিত নিজৰ বাসভৱনত কালিৰাম মেধিয়ে ইহলোক ত্যাগ কৰে।
উপসংহাৰ
কালিৰাম মেধি অসমৰ ইতিহাস, সাহিত্য আৰু ভাষাতত্ত্বৰ ক্ষেত্ৰত এক উজ্জ্বল নাম। তেওঁ এজন জ্ঞানপিপাসু চিন্তাবিদ, সফল প্রশাসক, গৱেষক আৰু সাহিত্যিক হিচাপে নিজৰ গভীৰ ছাঁ এৰিছিলে। তেওঁৰ ব্যাকৰণিক ৰচনাসমূহ, বৈষ্ণৱ সাহিত্যৰ গৱেষণা, আৰু সমাজসচেতন প্ৰবন্ধসমূহ অসমৰ বৌদ্ধিক ইতিহাসত এক অপূৰ্ব সম্পদ। নিজৰ কৰ্মজীৱনৰ সফলতাৰ উপৰিও তেওঁ সাহিত্য-সংস্কৃতিৰ জগতত বহুমুখী অৱদান আগবঢ়াই এক অনুকৰণীয় ব্যক্তিত্ব হিচাপে আজিও লোকস্মৃতিৰ পৃষ্ঠাত অমৰ হৈ ৰ’ল।
FAQs
1. কালিৰাম মেধিৰ জন্ম কেতিয়া হৈছিল?
A: ১৮৮০ চনৰ ১৮ অক্টোবৰ তাৰিখে কামৰূপ জিলাৰ ৰামদিয়া গাঁৱত।
2. তেওঁ কিমান বছৰৰ বয়সত ইহলোক ত্যাগ কৰিছিল?
A: তেওঁ ১৯৫৪ চনৰ ২৪ জানুৱাৰীত, ৭৩ বছৰ বয়সত মৃত্যু বৰণ কৰে।
3. কালিৰাম মেধিৰ সৰ্বাধিক পৰিচিত গ্ৰন্থ কোনখন?
A: ‘অসমীয়া ব্যাকৰণ আৰু ভাষাতত্ত্ব’ (১৯৩৬) হৈছে তেওঁৰ অন্যতম গুৰুত্বপূৰ্ণ আৰু জনপ্ৰিয় গ্ৰন্থ।
4. তেওঁ কোন সাহিত্য সভাৰ সভাপতি আছিল?
A: ১৯১৯ চনৰ অসম সাহিত্য সভাৰ তৃতীয় অধিবেশনত সভাপতি আছিল।
5. কালিৰাম মেধিয়ে কি কি উপাধিসমূহ লাভ কৰিছিল?
A: তেওঁ ‘তত্ত্বনিধি’ উপাধি (১৯৪৩) আৰু ‘ৰায়বাহাদুৰ অব আছাম’ খিতাপ (১৯৪৬) লাভ কৰিছিল।
Read also: Parvati Prasad Barua Biography | পাৰ্ৱতি প্ৰসাদ বৰুৱাৰ জীৱনী
My self Mahezubin Saikia. Working in Dev Library as a Content Writer. A website that provides all SCERT, NCERT 3 to 12, and BA, B.com, B.Sc, and Computer Science with Post Graduate Notes & Suggestions, Novel, eBooks, Health, Finance, Biography, Quotes, Study Materials, and more.
