মেৰী স্ক্লডভ্স্কা-কুৰী যাক মেৰী কুৰী (Marie Curie) বা মেডাম কুৰী নামেৰে জনা যায়, পোলেণ্ডৰ এগৰাকী খ্যাতনামা পদাৰ্থবিদ আৰু ৰসায়নবিদ আছিল। তেওঁ জীৱনৰ সিংহভাগ সময় ফ্ৰান্সত অতিবাহিত কৰি তেজস্ক্ৰিয়তা সম্পৰ্কীয় গৱেষণাত উল্লেখযোগ্য অৱদান আগবঢ়াইছিল। মেৰী কুৰী আছিল ন’বেল বঁটা লাভ কৰা প্ৰথম মহিলা, লগতে দুবাৰ ন’বেল বঁটা লাভ কৰা একমাত্ৰ মহিলা। তেওঁ বিজ্ঞানৰ দুটা ভিন্ন শাখাত ন’বেল লাভ কৰা একমাত্ৰ ব্যক্তি। পেৰিছ বিশ্ববিদ্যালয়ৰ প্ৰথম মহিলা অধ্যাপক হিচাপে তেওঁ ইতিহাস সৃষ্টি কৰিছিল। তদুপৰি, তেওঁৰ জীৱনৰ গৌৰৱৰ বাবে পেৰিছৰ পেন্থিয়নত সমাধি লাভ কৰা প্ৰথম মহিলা হিচাপে তেওঁ স্থান লাভ কৰিছিল।
মেৰী কুৰীৰ জন্মৰ সময়ত তেওঁৰ নাম আছিল মাৰিয়া ছেল’মিয়া স্ক্লডভ্স্কা। পোলেণ্ডৰ ৱাৰশ্ব’ চহৰত জন্ম হোৱা মেৰী কুৰীয়ে পোলেণ্ডৰ ‘ফ্লোটিং ইউনিভাৰ্চিটি’ত শিক্ষা গ্ৰহণ কৰি বিজ্ঞানৰ জ্ঞান লাভ কৰিছিল। ১৮৯১ চনত, ২৪ বছৰ বয়সত, তেওঁ উচ্চ শিক্ষাৰ বাবে পেৰিছলৈ গৈ পেৰিছ বিশ্ববিদ্যালয়ত অধ্যয়ন কৰে। সেয়েহে তেওঁ বিজ্ঞানত বিশেষ দখল আর্জি গৱেষণাৰ জগতত আগবাঢ়ি যায়। ১৯০৩ চনত তেওঁ পদাৰ্থবিজ্ঞানৰ ন’বেল বঁটা লাভ কৰে, যি তেওঁ গিৰিয়েক পিয়েৰ কুৰী আৰু বিজ্ঞানী হেন্ৰি বেকুৰেলৰ সৈতে ভাগ বতৰা কৰিছিল। ১৯১১ চনত তেওঁ পুনৰ ন’বেল বঁটা লাভ কৰে, এইবাৰ ৰসায়ন শাস্ত্ৰত।
Read also: Isaac Newton Biography | আইজাক নিউটনৰ জীৱনী
তেওঁৰ মূল গৱেষণাসমূহৰ ভিতৰত আছিল তেজস্ক্ৰিয়তাৰ তত্ত্ব (radioactivity শব্দটিও তেওঁ সৃষ্টি কৰিছিল), তেজস্ক্ৰিয় মৌলসমূহ পৃথকীকৰণ, আৰু নতুন মৌল প’ল’নিয়াম আৰু ৰেডিয়ামৰ আৱিষ্কাৰ। তদুপৰি, তেজস্ক্ৰিয় সমস্থানিকৰ ব্যৱহাৰেৰে কৰ্কট ৰোগৰ চিকিৎসাত গৱেষণা কৰা প্ৰথম ব্যক্তি আছিল তেওঁ। পেৰিছ আৰু ৱাৰশ্ব’ত তেওঁ ‘কুৰী শিক্ষা প্ৰতিষ্ঠান’ স্থাপন কৰিছিল, যি চিকিৎসা গৱেষণাৰ ক্ষেত্ৰত বিশ্বজুৰি প্ৰসিদ্ধ। প্ৰথম বিশ্বযুদ্ধৰ সময়ত তেওঁ সামৰিক চিকিৎসাৰ ক্ষেত্ৰত তেজস্ক্ৰিয় উপাদানৰ প্ৰয়োগৰ ব্যৱস্থা কৰিছিল।
যদিও মেৰী কুৰী ফ্ৰান্সৰ নাগৰিক হৈছিল, তথাপি তেওঁ নিজৰ পোলেণ্ডীয় পৰিচয় এৰি দিয়া নাছিল। তেওঁ নিজৰ সন্তানক পোলিছ ভাষা শিকাইছিল আৰু নিয়মীয়াকৈ পোলেণ্ড ভ্ৰমণ কৰিছিল। তেওঁ ১৮৯৮ চনত আৱিষ্কৃত মৌলৰ নাম ‘প’ল’নিয়াম’ ৰাখিছিল, যিয়ে তেওঁৰ মাতৃভূমি পোলেণ্ডক প্ৰতিনিধিত্ব কৰে।
| নাম (Name) | মেৰী কুৰী (Marie Curie) |
| জন্ম (Date of Birth) | ১৮৬৭ খ্ৰীষ্টাব্দ |
| জন্ম স্থান (Place of Birth) | পোলেণ্ডৰ ৱাৰশ্ব’ চহৰ |
| মৃত্যু (Death) | ৪ জুলাই, ১৯৩৪ |
| বঁটা (Awards) | ন’বেল বঁটা পদাৰ্থ বিজ্ঞান বিভাগত (১৯০৩)ডেভি মেডেল (১৯০৩)মেট্টেউচ্চি মেডেল (১৯০৪)ন’বেল বঁটা ৰসায়ন বিজ্ঞান বিভাগত (১৯১১) |
মেৰী কুৰীৰ প্ৰাৰম্ভিক জীৱন তথা শিক্ষা | Earlier Life and Education of Marie Curie
মেৰী কুৰীৰ শৈশৱ আৰু পৰিয়াল
মেৰী বা মাৰিয়াৰ জন্ম ১৮৬৭ খ্ৰীষ্টাব্দত বৰ্তমানৰ পোলেণ্ডৰ ৱাৰশ্ব’ চহৰত হৈছিল। তেখেতৰ পিতৃ আৰু মাতৃৰ নাম আছিল ক্ৰমে ৱ্লাডিস্ল স্ক্লড’ৱস্কি আৰু ব্ৰনিস্লাৱা। মাৰিয়াৰ ডাঙৰ চাৰিগৰাকী ভায়েক-বোন আছিল, যথা জ’ফিয়া (জন্ম ১৮৬২), জোচেফ (জন্ম ১৮৬৩), ব্ৰনিস্লাৱা (জন্ম ১৮৬৫) আৰু হেলেনা (জন্ম ১৮৬৬)। সেই সময়ত পোলেণ্ড ৰাছিয়াৰ শাসনাধীন আছিল।
পোলেণ্ডৰ সামাজিক পৰিস্থিতি আৰু শিক্ষা
সেই সময়ত পোলেণ্ডত মাতৃভাষাত শিক্ষাদান নিষিদ্ধ আছিল। মাৰিয়াৰ পিতৃ-মাতৃয়ে দেশৰ স্বশাসনৰ বাবে সংগ্রাম কৰা জাতীয়তাবাদী সংগঠনৰ লগত জড়িত থকাৰ বাবে সম্পত্তি হেৰুৱাব লগীয়া হৈছিল। তথাপি কিছুমান শিক্ষক সাহসিকতাৰে সংগোপনে পোলেণ্ডৰ ইতিহাস শিকাইছিল। মাৰিয়াৰ পিতৃ গণিত আৰু পদাৰ্থবিদ্যাৰ শিক্ষক আছিল আৰু ৱাৰশ্ব’ৰ দুই শিক্ষাশালাৰ পৰিচালনাৰ দায়িত্বত আছিল। কিন্তু ৰুছ শাসকে বিজ্ঞানৰ ব্যৱহাৰিক শিক্ষা বাতিল কৰাৰ ফলত তেখেতক চাকৰিৰ পৰা বৰ্খাস্ত কৰা হৈছিল।
মেৰী কুৰীৰ ব্যক্তিগত জীৱন
মাৰিয়াৰ মাতৃয়ে আৱাসিক বিদ্যালয় এখন চলাইছিল, কিন্তু মাৰিয়াৰ জন্মৰ পিছতে চাকৰিৰ পৰা অব্যাহতি লয়। ১২ বছৰ বয়সতে মাৰিয়াই মাতৃক যক্ষ্মাৰ ফলত হেৰুৱাব লগা হৈছিল। মাকৰ মৃত্যুৰ ২ বছৰ আগতে মাৰিয়াৰ ডাঙৰ বায়েক জ’ফিয়াৰো মৃত্যুবৰণ কৰে। এই ঘটনাসমূহে মাৰিয়াৰ ধৰ্মবিশ্বাসক প্ৰভাৱিত কৰিছিল, যাৰ ফলত তেখেত অজ্ঞেয়বাদীত ৰূপান্তৰিত হয়।
বিদ্যালয়ৰ শিক্ষা
মাৰিয়াই ১০ বছৰ বয়সত আৱাসিক বিদ্যালয়ত শিক্ষালাভ আৰম্ভ কৰে। ১২ জুন ১৮৮৩ চনত তেওঁ সোণৰ পদক লাভ কৰি বিদ্যালয়ৰ শিক্ষা সমাপ্ত কৰে। তাৰ পিছত স্বাস্থ্যজনিত সমস্যাৰ বাবে (সম্ভৱতঃ ডিপ্ৰেছন) এক বছৰ গাঁৱত আত্মীয়ৰ সৈতে কটায়। তাৰ পিছৰ বছৰৰ পৰা দেউতাকৰ লগত থাকি শিক্ষাদানত নিয়োজিত হয়।
উচ্চ শিক্ষা
সেই সময়ত ছোৱালীৰ উচ্চ শিক্ষাৰ সুযোগ সীমিত আছিল। মাৰিয়াই বায়েক ব্ৰনিস্লাৱাৰ সৈতে ‘ফ্লায়িং বিশ্ববিদ্যালয়’ত যোগদান কৰে, যি ৰুছিয়ান শাসনৰ বিৰোধিতা কৰি পোলেণ্ডৰ সংস্কৃতি আৰু স্বাভিমানৰ বিষয়ে পঢ়াইছিল। উচ্চ শিক্ষাৰ বাবে টকাৰ প্ৰয়োজন আছিল, যাৰ বাবে মাৰিয়াই ঘৰুৱা শিক্ষয়িত্ৰীৰ কাম কৰিছিল।
মেৰী কুৰীৰ জীৱনৰ সংকট আৰু প্ৰেম
আয়াৰ কাম
আয়াৰ কাম কৰি থাকোঁতেই মাৰিয়াৰ ধনী পৰিয়ালৰ এগৰাকী সন্তান ‘কাজিমিয়েৰ্জ জ’ৰাৱস্কি’ৰ সৈতে প্ৰেমৰ সম্পৰ্ক গঢ়ি উঠে। কিন্তু ল’ৰাজনৰ পৰিয়ালে দুখীয়া মাৰিয়াক স্বীকাৰ নকৰাত, তেখেতৰ প্ৰেম সম্পৰ্ক পূৰ্ণতা লাভ কৰিব নোৱাৰিলে। কাজিমিয়েৰ্জে পৰিয়ালৰ সিদ্ধান্ত মেন্তি ল’ব লগা হৈছিল।
উচ্চ শিক্ষাৰ পথ
১৮৯০ চনত ব্ৰনিস্লাৱা বিবাহপাশত আৱদ্ধ হয় আৰু মাৰিয়াক পেৰিছত অধ্যয়ন কৰিবলৈ আমন্ত্ৰণ জনায়। কিন্তু টকাৰ অভাৱৰ বাবে মাৰিয়াই সেই সুযোগ গ্ৰহণ কৰিব নোৱাৰিলে। তাৰ পিছতে দেউতাকে ভাল চাকৰি এটা লাভ কৰি মাৰিয়াক সহায় কৰে। ১৮৮৯ চনত মাৰিয়াই দেউতাকৰ লগত ৱাৰশ্ব’ত থাকিবলৈ লৈছিল আৰু উপাৰ্জনৰ বাবে আয়াৰ কাম কৰি আছিল।
বিজ্ঞানৰ প্ৰতি আগ্ৰহ
মাৰিয়াই ‘ফ্লায়িং বিশ্ববিদ্যালয়’ত অধ্যয়ন কৰি আৰু ‘উদ্যোগ আৰু কৃষিৰ যাদুঘৰ’ত বিজ্ঞানৰ প্ৰয়োগমুখী শিক্ষা গ্ৰহণ কৰি নিজৰ জ্ঞান বৃদ্ধি কৰিছিল। এই শিক্ষাই তেখেতৰ ভৱিষ্যত বিজ্ঞানী হোৱাৰ ভিত্তি প্ৰস্তুত কৰিছিল।
পেৰিছত মেৰী কুৰীৰ জীৱন আৰু বৈজ্ঞানিক যাত্ৰা | Marie Curie’s life and scientific journey in Paris
ৱাৰশ্ব’ৰ পৰা পেৰিছলৈ যাত্ৰা
১৮৯১ চনত মেৰী কুৰী (মাৰিয়া স্ক্লোডস্কা) পোলেণ্ডৰ ৱাৰশ্ব’ৰ পৰা পেৰিছলৈ যায়। তেওঁ পেৰিছ বিশ্ববিদ্যালয় (ছ’ৰবন)ত নামভৰ্তি কৰে আৰু প্ৰথমে বায়েক ভিনিহিয়েকৰ সৈতে থাকিছিল। কিন্তু শীঘ্ৰেই পঢ়া-শুনাৰ সুবিধাৰ বাবে বিশ্ববিদ্যলয়ৰ ওচৰত থাকিবলৈ একা ঘৰ লয়।
সংঘৰ্ষ আৰু অধ্যৱসায়
অর্থনৈতিক অসুবিধাৰ বাবে মেৰীয়ে বহু কষ্ট সহ্য কৰিছিল। শীতকালত ঠাণ্ডাৰ প্ৰভাৱ আৰু পুষ্টিকৰ আহাৰৰ অভাৱত তেওঁ কেতিয়াবা অজ্ঞান হৈ গৈছিল। নিজৰ খৰচ উলিয়াবলৈ তেওঁ দিনত পঢ়াৰ কাম কৰি সন্ধিয়া টিউছন দিছিল।
প্ৰথম বৈজ্ঞানিক ডিগ্ৰী লাভ
১৮৯৩ চনত মেৰীয়ে পদাৰ্থবিজ্ঞানত ডিগ্ৰী লাভ কৰে আৰু অধ্যাপক গেব্ৰিয়েল লিপমেনৰ প্ৰয়োগশালাত কাম কৰিবলৈ আৰম্ভ কৰে। তাতেও তেওঁ ছ’ৰবনত অধ্যয়ন অব্যাহত ৰাখে আৰু ১৮৯৪ চনত আন এটা ডিগ্ৰী লাভ কৰে।
বৈজ্ঞানিক গৱেষণাৰ আৰম্ভণি
মেৰীৰ গৱেষণামূলক কৰ্মজীৱন ‘ছ’চাইটি ফৰ দ্য এনকাৰেজমেণ্ট অৱ নেচনেল ইণ্ডাষ্ট্ৰি’ৰ অধীনত চলা এক গৱেষণাপ্ৰকল্পৰ সৈতে আৰম্ভ হয়। তেওঁ চুম্বকত্ব সম্পৰ্কীয় গৱেষণাত মনোনিবেশ কৰে।
পিয়েৰ কুৰীৰ লগত পৰিচয়
এই সময়তে মেৰী পিয়েৰ কুৰীৰ লগত পৰিচিত হয়। দুয়োৰে বিজ্ঞানৰ প্ৰতি থকা গভীৰ আগ্ৰহে তেওঁলোকক ওচৰলৈ আনে। মেৰীয়ে ডাঙৰ পৰীক্ষাগাৰৰ প্ৰয়োজন অনুভৱ কৰিছিল, যাৰ বাবে অধ্যাপক জোছেফ উইৰুজ-কোৱালস্কিয়ে পিয়েৰৰ লগত পৰিচয় কৰাই দিয়ে। পিয়েৰে যদিও নিজা কোনো পৰীক্ষাগাৰ নাছিল, তথাপি তেওঁ মেৰীক সহায় কৰিবলৈ আগবাঢ়ি আহে।
বিয়াৰ সিদ্ধান্ত আৰু পোলেণ্ডলৈ উভতি যোৱা
পিয়েৰে মেৰীক বিবাহৰ প্ৰস্তাৱ দিয়ে, কিন্তু মেৰীয়ে প্ৰথমতে মানি নলয়, কিয়নো তেওঁ পোলেণ্ডলৈ উভতি গৈ তাত গৱেষণা কৰিবলৈ বিচাৰিছিল। পিয়েৰে তেওঁক আশ্বাস দিয়ে যে প্ৰয়োজন হলে তেওঁ পোলেণ্ডলৈ যাব। মেৰী ১৮৯৪ চনত পোলেণ্ডলৈ যায়, কিন্তু তাত বিজ্ঞানৰ ক্ষেত্ৰত সুযোগ নথকাৰ বাবে হতাশ হয়। ক্ৰাকাৱ বিশ্ববিদ্যালয়ত মহিলাসকলৰ নামভৰ্তি নিষিদ্ধ আছিল।
পেৰিছলৈ উভতি অহা আৰু বিয়া
পিয়েৰৰ পৰা অনুপ্ৰেৰণা পাই মেৰী আকৌ পেৰিছলৈ উভতি যায়। পিয়েৰে এই সময়তে চুম্বকত্ব সম্পৰ্কীয় এক গৱেষণাপত্ৰ লিখে আৰু ডক্টৰেট উপাধি লাভ কৰে। লগতে তেওঁ অধ্যাপকৰ পদত নিযুক্ত হয়। ১৮৯৫ চনত মেৰী আৰু পিয়েৰে বিবাহ সম্পন্ন কৰে, যদিও ধর্মীয় আচার-অনুষ্ঠানত দুয়োৰে বিশেষ আস্থা নাছিল। বিয়াৰ সময়ত মেৰীয়ে পিন্ধা নীলা পোছাকজোৰেই পাছত পৰীক্ষাগাৰত কাম কৰিবলৈও ব্যৱহাৰ কৰিছিল।
সহযাত্ৰী আৰু জীৱনসংগ্ৰাম
বিয়াৰ পিছত দুয়ো একেলগে বিজ্ঞান সাধনাত মনোনিবেশ কৰে। তেওঁলোকৰ বিনোদনৰ একমাত্ৰ উপায় আছিল চাইকেল ভ্ৰমণ আৰু বিদেশ ভ্ৰমণ। এই সময়তে মেৰীয়ে পিয়েৰত প্ৰেমিক, বন্ধু, আৰু বিশ্বাসী সহকৰ্মী হিচাপে লাভ কৰিছিল, যিয়ে তেওঁলোকৰ বিজ্ঞান সাধনাক অধিক শক্তিশালী কৰি তুলিছিল।
নতুন মৌলৰ আৱিষ্কাৰ: কুৰী দম্পতীৰ ঐতিহাসিক গৱেষণা
প্ৰাথমিক পদক্ষেপ আৰু পটভূমি
১৮৯৫ চনত উইলিয়াম ৰণ্টজেনে ৰঞ্জন ৰশ্মি আৱিষ্কাৰ কৰে, কিন্তু ইয়াৰ অন্তৰালৰ কাৰণ সম্পূৰ্ণৰূপে বুজিব পৰা নাছিল। ১৮৯৬ চনত হেনৰি বেকুৰেলে ইউৰেনিয়ামৰ পৰা নিৰ্গত এক বিশেষ ৰশ্মিৰ সন্ধান পায়, যি বাহ্যিক শক্তি অবিহনে নিজে নিজেই বিকিৰণ কৰিছিল। মেৰী কুৰীয়ে এই ৰশ্মিৰ ওপৰত গৱেষণা কৰিবলৈ সিদ্ধান্ত লয়।
গৱেষণাৰ নতুন দিশ
মেৰীয়ে বৈদ্যুতিক প্ৰৱাহ মাপিবলৈ এক বিশেষ ইলেক্ট্ৰ’মিটাৰ ব্যৱহাৰ কৰে। এই যন্ত্ৰৰ সহায়ত তেওঁ আবিষ্কাৰ কৰে যে ইউৰেনিয়ামৰ বিকিৰিত ৰশ্মিয়ে বায়ুত বৈদ্যুতিক প্ৰৱাহ সৃষ্টি কৰে। এই তথ্যৰ আধাৰত, মেৰীয়ে উপসংহাৰ কৰে যে বিকিৰণ পৰমাণুৰ নিজা বৈশিষ্ট্য।
গৱেষণাৰ কঠিন পথ
১৮৯৭ চনত কুৰী দম্পতীৰ প্ৰথম সন্তান আইৰিন জলিয়ট কুৰীৰ জন্ম হয়। অর্থনৈতিক সমস্যাৰ বাবে মেৰীয়ে শিক্ষয়িত্ৰী হিচাপে যোগ দিয়ে। তেওঁলোকৰ গৱেষণাৰ বাবে কোনো পৃথক প্ৰয়োগশালা নাছিল, গতিকে চিকিৎসা শিক্ষাৰ প্ৰাক্তন মৃতদেহ ব্যৱচ্ছেদ কক্ষত তেওঁলোকে গৱেষণা অব্যাহত ৰাখে।
নতুন মৌলৰ সন্ধান
মেৰীয়ে ইউৰেনিয়ামযুক্ত খনিজ ‘পিট্চব্লেণ্ড’ আৰু ‘টাৰ্ব’নাইট’ ব্যৱহাৰ কৰি গৱেষণা আৰম্ভ কৰে। তেওঁ লক্ষ্য কৰে যে পিট্চব্লেণ্ড ইউৰেনিয়ামতকৈ চাৰিগুণ বেছি সক্ৰিয়। সেয়ে তেওঁ উপসংহাৰ কৰে যে ইয়াত আন এক তেজস্ক্ৰিয় মৌল থকা সম্ভাৱনা আছে। ১৮৯৮ চনত তেওঁ থ’ৰিয়ামৰ তেজস্ক্ৰিয়তা আৱিষ্কাৰ কৰে।
পিয়েৰ কুৰীৰ অংশগ্ৰহণ
মেৰীৰ গৱেষণাৰ প্ৰতি পিয়েৰ কুৰীও আগ্ৰহী হৈ উঠে আৰু তেওঁ নিজৰ স্ফটিক গৱেষণা ত্যাগ কৰি মেৰীৰ লগত একেলগে কাম কৰিবলৈ আৰম্ভ কৰে।
ৰেডিয়ামৰ আৱিষ্কাৰ
চাৰিবছৰ একেৰাহে কঠোৰ গৱেষণাৰ পিছত কুৰী দম্পতীয়ে ৰেডিয়াম পৃথক কৰিবলৈ সক্ষম হয়। ১৯০২ চনৰ এক সন্ধিয়াত তেওঁলোকে বিশুদ্ধ ৰেডিয়াম লাভ কৰে। ৰেডিয়ামৰ এই সফল আবিষ্কাৰে তেওঁলোকৰ গৱেষণা পৃথিৱীত নতুন যুগৰ সূচনা কৰে।
কুৰী দম্পতীয়ে তেজস্ক্ৰিয় মৌলৰ গৱেষণাৰ জগতে এক নতুন অধ্যায় সৃষ্টি কৰে। তেওঁলোকৰ ত্যাগ আৰু অধ্যৱসায়ে আধুনিক পদাৰ্থ বিজ্ঞান আৰু চিকিৎসা বিজ্ঞানে অভূতপূৰ্ব বিকাশ ঘটাবলৈ সহায় কৰে।
গৱেষণা আৰু পুৰস্কাৰ | Research and Awards
পিয়েৰ কুৰী আৰু মেৰী কুৰী একেলগে গৱেষণাত নিমগ্ন হৈ আছিল। তেওঁলোকৰ একাগ্ৰতাই বহু গুৰুত্বপূৰ্ণ বৈজ্ঞানিক আৱিষ্কাৰৰ পথ প্রশস্ত কৰিছিল।
১৯০৩ চনত মেৰী কুৰীয়ে (Marie Curie) ‘ডক্টৰ অব চায়েন্স’ সন্মান লাভ কৰে। সেই বছৰৰ শেষত, বৈজ্ঞানিক হেনৰি বেকুৱেৰেলৰ সৈতে ভগাভগি কৰি তেওঁ ন’বেল পুৰস্কাৰ লাভ কৰে। পুৰস্কাৰ লাভৰ পিছতো তেওঁ আৰু পিয়েৰ গৱেষণাৰ কামত নিজকে অধিক মনোনিবেশ কৰে।
অঘটন আৰু মেৰীৰ সংগ্রাম
১৯০৬ চনত মেৰী আৰু পিয়েৰে একান্ত পৰিৱেশত ছুটি কাটাবলৈ এটা কটেজ ভাড়া লয়। কিন্তু কিছুদিনৰ পিছতে এক দুৰ্ঘটনাত পিয়েৰ কুৰীৰ মৃত্যু হয়। পিয়েৰৰ মৃত্যুৱে মেৰীক গভীৰ দুখত পেলায়। তেওঁৰ সন্তানবোৰো এই কঠিন সময়ত অসহায় হৈ পৰে।
গৱেষণা অব্যাহত
পিয়েৰে মৃত্যুৰ আগতে মেৰীক কৈ গৈছিল- “আমাৰ এজন থাকিলেও যাতে গৱেষণাৰ কাম স্থবিৰ হৈ নপৰে।” এই কথাকে মনে মনে লৈ মেৰীয়ে গৱেষণাৰ কাম অব্যাহত ৰাখে। চৰবেন বিশ্ববিদ্যালয়ে পিয়েৰৰ স্থান মেৰীক দিয়ে, আৰু তেওঁ পুনৰ গৱেষণাৰ কামত মনোনিবেশ কৰে।
১৯১১ চনত মেৰী কুৰীয়ে এককভাৱে পুনৰ ন’বেল পুৰস্কাৰ লাভ কৰে। এই সফলতাই বৈজ্ঞানিক মহলে তেওঁৰ পৰিশ্ৰম আৰু নিষ্ঠাক উচ্চ মূল্যায়ন কৰে।
ইনষ্টিটিউট অৱ ৰেডিয়াম আৰু মেৰীৰ জীৱনযাত্ৰা
পেৰিছত এক নতুন পৰীক্ষাগাৰ স্থাপন কৰা হয়, যি পিয়েৰ কুৰীৰ নামত নিৰ্ধাৰণ কৰা হয়। এই পৰীক্ষাগাৰ ‘ইনষ্টিটিউট অৱ ৰেডিয়াম’ নামেৰে পৰিচিত হয়। ১৯২১ চনত মেৰীয়ে তেওঁৰ দুজনী কন্যাসন্তানক লৈ আমেৰিকা ভ্ৰমণ কৰে। হোৱাইট হাউচত ৰাষ্ট্ৰপতি হাৰ্ডিঞ্জে মেৰীক কিছু পৰিমাণৰ ৰেডিয়াম উপহাৰ দিয়ে।
গৱেষণাৰ উত্তৰাধিকাৰী
মেৰীৰ জীয়েক আইৰিন কুৰীয়ে তৰুণ বিজ্ঞানী ফ্ৰেডৰিক জোলিয়টৰ সৈতে বিবাহ পাশত আবদ্ধ হয়। তেওঁলোকেও গৱেষণাত নিজৰ অৱদান আগবঢ়াই ১৯৩৫ চনত ন’বেল পুৰস্কাৰ লাভ কৰে। মেৰী কুৰীৰ অধ্যৱসায়, আত্মত্যাগ আৰু নিষ্ঠাই বৈজ্ঞানিক জগতত এক নতুন যুগৰ সৃষ্টি কৰিছিল।
মেৰী কুৰিৰ মৃত্যু | Death Marie Curie
১৯৩৪ চনৰ আৰম্ভণিতে, মেৰী কুৰিয়ে শেষবাৰৰ বাবে নিজৰ জন্মভূমি পোলেণ্ডলৈ ভ্ৰমণ কৰিছিল। এই ভ্ৰমণ তেওঁৰ জীৱনৰ অন্তিম উল্লেখযোগ্য ঘটনাসমূহৰ অন্যতম আছিল।
কেইমাহমানৰ পাছত, ১৯৩৪ চনৰ ৪ জুলাইত, মেৰী কুৰিৰ মৃত্যু হয়। তেওঁ হাউট-ছাভ’ইৰ পেচিৰ ছানচেলেম’জ চেনেটৰিয়ামত ৬৬ বছৰ বয়সত শেষ নিশ্বাস ত্যাগ কৰে। তেওঁৰ মৃত্যুৰ প্ৰধান কাৰণ আছিল এপ্লাষ্টিক এনিমিয়া, যাৰ ফলত হাড়ৰ মজ্জাৰ গঠন ক্ষমতা ক্ষয়প্ৰাপ্ত হৈছিল।
উপসংহাৰ | Conclusion
মেৰী কুৰী (Marie Curie) আছিল এক অতি প্ৰতিভাৱান বিজ্ঞানী, যিয়ে ৰেডিয়াম আৰু পোলোনিয়াম নামৰ মৌলৰ আৱিষ্কাৰ কৰি বিজ্ঞানৰ জগতত এক নতুন দিশ সূচনা কৰিছিল। তেওঁৰ উদ্ভাৱনাই চিকিৎসা, শক্তি আৰু বিজ্ঞানৰ অতি গুৰুত্বপূর্ণ ক্ষেত্ৰসমূহত বিপ্লৱ আনিছিল। মেৰী কুৰীয়ে দুবাৰ নোবেল বঁটা লাভ কৰি তেওঁৰ অৱদানৰ পৰিসৰ আৰু গম্ভীৰতাক প্ৰমাণিত কৰিছিল। তেখেতৰ জীৱন আছিল এক উজ্জ্বল পৰিসমাপ্তি, যি সকলৰ বাবে অনুপ্ৰেৰণাৰ উৎস। মেৰী কুৰীৰ জীৱন আৰু কৃতিত্বসমূহ বিজ্ঞানৰ ইতিহাসত অনন্য আৰু চিৰকালৰ বাবে সন্মানিত থাকিব।
FAQ
1. মেৰী কুৰী (Marie Curie) কোন আছিল?
A: মেৰী কুৰী পোলেণ্ডৰ এগৰাকী খ্যাতনামা পদাৰ্থবিদ আৰু ৰসায়নবিদ আছিল।।
2. মেৰী কুৰী জন্ম কেতিয়া আৰু ক’ত হৈছিল?
A: মেৰী বা মাৰিয়াৰ জন্ম ১৮৬৭ খ্ৰীষ্টাব্দত বৰ্তমানৰ পোলেণ্ডৰ ৱাৰশ্ব’ চহৰত হৈছিল।
3. মেৰী কুৰী মৃত্যু কেতিয়া হৈছিল?
A: ১৯৩৪ চনৰ ৪ জুলাইত, মেৰী কুৰিৰ মৃত্যু হৈছিল।
4. মেৰী কুৰীৰ গুৰুত্বপূৰ্ণ আবিষ্কাৰ কি আছিল?
A: মেৰী কুৰী বিশেষভাৱে ৰেডিয়াম (Radium) আৰু পোলোনিয়াম (Polonium) নামৰ মৌলৰ আবিষ্কাৰৰ বাবে বিখ্যাত।
5. মেৰী কুৰীয়ে কিমানবাৰ নোবেল পুৰস্কাৰ আছিল?
A: মেৰী কুৰীয়ে দুবাৰ নোবেল পুৰস্কাৰ লাভ কৰিছিল।
Read also: Isaac Newton Biography | আইজাক নিউটনৰ জীৱনী
My self Mahezubin Saikia. Working in Dev Library as a Content Writer. A website that provides all SCERT, NCERT 3 to 12, and BA, B.com, B.Sc, and Computer Science with Post Graduate Notes & Suggestions, Novel, eBooks, Health, Finance, Biography, Quotes, Study Materials, and more.
