ইলন ৰিভ মাস্ক (Elon Reeve Musk) এগৰাকী বিশিষ্ট উদ্যোগপতি, বিনিয়োগকাৰী আৰু সমাজসেৱী। তেওঁ দক্ষিণ আফ্ৰিকা, কানাডা আৰু আমেৰিকা যুক্তৰাষ্ট্ৰৰ নাগৰিক। ইলন মাস্ক স্পেছএক্স (SpaceX)-ৰ প্ৰতিষ্ঠাপক, মুখ্য কাৰ্যবাহী বিষয়া (CEO) আৰু মুখ্য প্ৰযুক্তি বিষয়া (CTO) হিচাপে কৰ্মৰত। লগতে, তেওঁ টেছলা (Tesla Inc.)-ৰ সহ-প্ৰতিষ্ঠাপক, CEO আৰু মুখ্য নক্সাকাৰী; নিউৰালিংক (Neuralink)-ৰ সহ-প্ৰতিষ্ঠাপক আৰু CEO; আৰু পেইপল (PayPal)-ৰ সহ-প্ৰতিষ্ঠাপক।
ব্লুমবাৰ্গ বিলিয়নেয়াৰ্ছ ইনডেক্স আৰু ফ’ৰ্বচৰ বিত্তীয় তালিকা অনুসৰি, ২০২২ চনৰ মে’ মাহলৈ ইলন মাস্কৰ সম্পত্তিৰ মূল্য প্ৰায় ২৬৫ বিলিয়ন ডলাৰ আছিল, যিয়ে তেওঁক বিশ্বৰ আটাইতকৈ ধনী ব্যক্তি হিচাপে স্থান প্ৰদান কৰিছিল।
দক্ষিণ আফ্ৰিকাৰ প্ৰিটোৰিয়াত জন্ম হোৱা মাস্ক ১৭ বছৰ বয়সত উচ্চ শিক্ষাৰ বাবে কানাডালৈ গুছি যায়। তেওঁ কুইন্স বিশ্ববিদ্যালয়ত অধ্যয়ন কৰাৰ পিছত পেনিছিলভেনিয়া বিশ্ববিদ্যালয়ত ভৰ্তি হয় আৰু তাত অৰ্থনীতি আৰু পদাৰ্থবিজ্ঞানত ডিগ্ৰী লাভ কৰে। ১৯৯৫ চনত, তেওঁ ষ্টেনফ’ৰ্ড বিশ্ববিদ্যালয়ত পি.এইচ.ডি. অধ্যয়ন আৰম্ভ কৰিছিল, কিন্তু মাত্র দুদিনৰ ভিতৰত নিজৰ উদ্যোগ গঢ়াৰ লক্ষ্যে গৱেষণা ত্যাগ কৰে।
তেওঁ প্ৰথমে Zip2 নামৰ ৱেব ছফ্টৱেৰ কোম্পানী এটা প্ৰতিষ্ঠা কৰিছিল, যাক ১৯৯৯ চনত Compaq কোম্পানীয়ে ৩৪০ নিযুত ডলাৰত ক্ৰয় কৰে। তাৰ পিছতে, মাস্কে X.com নামেৰে অনলাইন বেংকিং ব্যৱসায় আৰম্ভ কৰে, যি পিছলৈ পেইপল (PayPal) হিচাপে পৰিচিত হয়।
| নাম | ইলন ৰিভ্ মাস্ক্ (Elon Reeve Musk) |
| জন্ম | ২৮ জুন, ১৯৭১ |
| পেচা | উদ্যোগী ব্যক্তি, বিনিয়োগকাৰী, অভিযন্তা |
ইলন মাস্ক (Elon Musk) ৰ উদ্যোগ আৰু লক্ষ্য
স্পেছ্এক্স প্ৰতিষ্ঠা (২০০২)
২০০২ চনৰ মে’ মাহত ইলন মাস্কে স্পেছ্এক্স (SpaceX) নামৰ বিমান আৰু মহাকাশযান নিৰ্মাণ কোম্পানী প্ৰতিষ্ঠা কৰে। এতিয়া তেওঁ এই কোম্পানীটোৰ মুখ্য কাৰ্য্যবাহী বিষয়া (CEO) আৰু মুখ্য আৰ্হি-নিৰ্মাতা হিচাপে দায়িত্ব পালন কৰি আছে।
টেছলা আৰু বৈদ্যুতিক যান (২০০৩)
২০০৩ চনত মাস্কে বৈদ্যুতিক গাড়ী আৰু সৌৰ শক্তিচালিত প্ৰযুক্তি উন্নয়নৰ বাবে টেছলা (Tesla, Inc.) নামৰ কোম্পানী গঢ়ি তুলিবলৈ বিত্তীয় সহায় আগবঢ়াইছিল। পিছলৈ তেওঁ টেছলাৰ মুখ্য কাৰ্য্যবাহী বিষয়া আৰু মুখ্য স্থপতি হিচাপে পৰিগণিত হয়।
ছ’লাৰচিটী আৰু সৌৰশক্তি উদ্যোগ (২০০৬)
২০০৬ চনত ইলন মাস্কে সৌৰশক্তিৰ সদ্ব্যৱহাৰ বৃদ্ধি কৰিবলৈ ছ’লাৰচিটী (SolarCity) প্ৰতিষ্ঠা কৰিছিল। ছ’লাৰচিটী টেছলাৰ অংশ হিচাপে বিবেচিত হয়, আৰু মাস্কে এই উদ্যোগৰ অধ্যক্ষৰ দায়িত্বও পালন কৰিছে।
কৃত্ৰিম বুদ্ধিমত্তা (২০১৫) – অপেনএআই
২০১৫ চনত ইলন মাস্কে বন্ধুভাৱাপন্ন কৃত্ৰিম বুদ্ধিমত্তাৰ বিকাশৰ উদ্দেশ্যে অপেনএআই (OpenAI) নামৰ অলাভজনক গৱেষণা প্ৰতিষ্ঠানটো সহ-প্ৰতিষ্ঠা কৰিছিল। এই প্ৰতিষ্ঠানটো AI প্ৰযুক্তি উন্নয়নৰ ক্ষেত্ৰত গুৰুত্বপূৰ্ণ ভূমিকা পালন কৰি আহিছে।
নিউৰালিংক (২০১৬) – মগজু আৰু কম্পিউটাৰৰ সংযোগ
২০১৬ চনৰ জুলাই মাহত মাস্কে নিউৰালিংক (Neuralink) প্ৰতিষ্ঠা কৰিছিল। এই প্ৰতিষ্ঠানটো মগজুৰ সৈতে কম্পিউটাৰৰ সংযোগ স্থাপন কৰাৰ ওপৰত গুৰুত্ব দিয়ে। মাস্কে নিউৰালিংকৰ মুখ্য কাৰ্য্যবাহী বিষয়া হিচাপে কৰ্মৰত আছে।
দ্য ব’ৰিং কোম্পানী (২০১৬) – সুৰংগ নিৰ্মাণ উদ্যোগ
২০১৬ চনৰ ডিচেম্বৰ মাহত মাস্কে দ্য ব’ৰিং কোম্পানী (The Boring Company) প্ৰতিষ্ঠা কৰে। এই প্ৰতিষ্ঠানটোৱে আধুনিক সুৰংগ প্ৰযুক্তিৰ সহায়ত পৰিবহণ ব্যৱস্থাৰ উন্নতি ঘটাবলৈ লক্ষ্য ৰাখিছে।
ভৱিষ্যৎ পৰিকল্পনা আৰু লক্ষ্য
ইলন মাস্কৰ উদ্যোগসমূহ কেৱল ব্যৱসায়িক লাভত সীমিত নহয়। তেওঁ মানৱসভ্যতাৰ উন্নয়ন আৰু টেকসই প্ৰযুক্তিৰ বিকাশত গুৰুত্ব দিয়ে। তেওঁৰ কেইখনমান গুৰুত্বপূৰ্ণ লক্ষ্য হ’ল:
- হাইপাৰলুপ: এক উচ্চবেগী যাতায়ত ব্যৱস্থা, যি মানুহৰ যাত্ৰাৰ সময় কমাব।
- বৈদ্যুতিক জেট: উলম্বভাৱে উৰণ আৰু অৱতৰণ কৰিব পৰা শব্দতকৈ বেগী বৈদ্যুতিক বিমান।
- পৃথিৱীৰ টেকসই শক্তি: নবীকৰণযোগ্য শক্তিৰ সহায়ত গ্লোবেল উষ্ণতা হ্ৰাস কৰাৰ প্ৰচেষ্টা।
- মংগল বাসযোগ্য কৰা: মানৱসভ্যতাৰ নিৰাপত্তা নিশ্চিত কৰিবলৈ মংগল গ্ৰহত মানুহৰ বসবাসযোগ্য এলেকা গঢ়াৰ পৰিকল্পনা।
ইলন মাস্কৰ প্ৰতিটো উদ্যোগ পৃথিৱীৰ ভৱিষ্যৎ গঠনৰ উদ্দেশ্যে কেন্দ্ৰীভূত, আৰু তেওঁৰ বিজ্ঞান-প্ৰযুক্তিগত দৃষ্টিভংগীয়ে বিশ্বব্যাপী পৰিবৰ্তন আনিবলৈ চেষ্টা কৰি আহিছে।
ইলন মাস্ক (Elon Musk) ৰ প্ৰাৰম্ভিক জীৱন আৰু পৰিয়াল
জন্ম আৰু পৰিয়ালৰ পৰিচয়
১৯৭১ চনৰ ২৮ জুনত ইলন মাস্ক (Elon Musk) ৰ জন্ম দক্ষিণ আফ্ৰিকাৰ ট্ৰান্সভাল প্ৰদেশৰ প্ৰিট’ৰিয়াত হৈছিল। তেওঁৰ মাতৃ মেই মাস্ক্ কানাডাৰ ৰেজিনাৰ এগৰাকী মডেল আৰু পথ্য বিশেষজ্ঞ আছিল। তেওঁৰ দেউতাক এৰল মাস্ক্ এজন দক্ষ বিদ্যুৎৰাসায়নিক অভিযন্তা, বিমান চালক, আৰু নাবিক আছিল। মাস্কৰ কনিষ্ঠ ভাতৃ কিমবল (জন্ম ১৯৭২) আৰু একমাত্ৰ ভনী তস্কা (জন্ম ১৯৭৪)। মাস্কৰ মাতৃৰ ফালৰ ককা ড॰ জছোৱা হাল্ডেমেন এগৰাকী আমেৰিকাত জন্মলোৱা কানাডিয়ান আছিল, আৰু তেওঁৰ আইতাক এজনী ব্ৰিটিছ আছিল। মাস্কৰ পৰিয়ালৰ লগত পেনছিলভেনিয়াৰ ডাটছ্ বংশৰো সম্পৰ্ক আছে।
শৈশৱৰ কঠিন সময়
শৈশৱতে চিকিৎসকে মাস্কক বধিৰ বুলি সন্দেহ কৰিছিল আৰু তাৰ বাবে তেওঁৰ কণ্ঠশালু অপসাৰণ কৰা হৈছিল। কিন্তু তেওঁৰ মাকে বুজি পাইছিল যে ইলন প্ৰকৃততে গভীৰভাৱে অন্য দিশত চিন্তা কৰে। মাস্কৰ পৰিয়াল বিত্তীয়ভাৱে সুসংহত আছিল, আৰু তেওঁৰ দেউতাকে কৈছিল, “আমাৰ হাতত কেতিয়াবা ইমান টকা আছিল যে চন্দুকটো বন্ধ কৰিবও পৰা নাছিলো।”
দেউতাকৰ সৈতে সম্পর্ক আৰু শিক্ষা
১৯৮০ চনত মাস্কৰ মাক-দেউতাকৰ বিবাহ বিচ্ছেদ হয়, যাৰ পিছত তেওঁ মূলত দেউতাকৰ সৈতে বাস কৰিবলৈ লয়। কিন্তু পাছলৈ তেওঁ এই সিদ্ধান্তৰ বাবে অনুশোচনা কৰে আৰু দেউতাকক “এজন ভয়ংকৰ মানুহ” বুলি বৰ্ণনা কৰে। মাস্কৰ দেউতাকৰ পৰা অৰ্ধ-ভগ্নী আৰু অৰ্ধ-ভাতৃও আছে। শৈশৱতে তেওঁ দেওবৰীয়া এংলিকান বিদ্যালয়ত শিক্ষা গ্ৰহণ কৰিছিল।
কম্পিউটাৰৰ প্ৰতি আগ্ৰহ আৰু প্ৰাৰম্ভিক উদ্ভাৱন
মাত্ৰ ১০ বছৰ বয়সতে মাস্কৰ কম্পিউটিং আৰু ভিডিঅ’ গেমৰ প্রতি গভীৰ আগ্ৰহ জন্মে। তেওঁ Commodore VIC-20 কম্পিউটাৰ এখন ক্ৰয় কৰি নিজে নিজে প্ৰগ্ৰেমিং শিকি উঠে। ১২ বছৰ বয়সত, তেওঁ নিজৰ সৃষ্টি ‘ব্লাষ্টাৰ’ নামৰ ভিডিঅ’ গেম ৫০০ ডলাৰত বিক্ৰী কৰিছিল।
বিদ্যালয়ৰ সময়ৰ অভিজ্ঞতা
ইলন মাস্ক (Elon Musk) অন্তৰ্মুখী স্বভাৱৰ আছিল আৰু বিদ্যালয়ৰ দিনত হাৰাশাস্তিৰ সন্মুখীন হৈছিল। এবাৰ কেইটামান ছাত্ৰই তেওঁক চিৰিৰ পৰা ঠেলি দিয়া ফলত তেওঁ গুৰুতৰভাৱে আঘাতপ্ৰাপ্ত হৈছিল। তেওঁ প্ৰথমে ৱাটাৰক্লফ হাউছ প্ৰিপাৰেটৰী স্কুল, তাৰপিছত ব্ৰায়ানষ্টন হাইস্কুলত শিক্ষা গ্ৰহণ কৰে। অৱশেষত, তেওঁ প্ৰিট’ৰিয়া বালক হাইস্কুলৰ পৰা উচ্চ শিক্ষা সমাপ্ত কৰে।
ইলন মাস্ক (Elon Musk) ৰ শিক্ষা আৰু প্ৰথম জীৱন
দক্ষিণ আফ্ৰিকাৰ প্ৰিট’ৰিয়া বালক হাইস্কুলত অধ্যয়ন কৰি মাস্ক উত্তীৰ্ণ হয়। কানাডালৈ স্থানান্তৰ হোৱাৰ বাবে সহজ সুযোগ বিচাৰি, তেওঁ তেওঁৰ মাতৃৰ নাগৰিকত্বৰ জৰিয়তে পাৰপত্ৰৰ বাবে আবেদন কৰিছিল। নথিপত্ৰ সম্পূৰ্ণ হোৱা নাছিল বাবে, তেওঁ সাময়িকভাৱে প্ৰিট’ৰিয়া বিশ্ববিদ্যালয়ত নামভৰ্তি হৈছিল, যাৰ ফলত দক্ষিণ আফ্ৰিকাৰ সামরিক সেৱাৰ বাধ্যতামূলক নিয়মৰ পৰা মুক্তি লাভ কৰিছিল। ১৯৮৯ চনত কানাডালৈ গতি কৰি, তেওঁ ছাচকাটচেৱানত পৰিয়ালৰ লগত আছিল আৰু বিভিন্ন সাময়িক কামত জড়িত আছিল।
বিশ্ববিদ্যালয় আৰু উচ্চ শিক্ষা
১৯৯০ চনত মাস্কে কুইন্স বিশ্ববিদ্যালয়ত নামভৰ্তি কৰে। দুবছৰ পাছত তেওঁ পেনছিলভেনিয়া বিশ্ববিদ্যালয়লৈ স্থানান্তৰিত হয়, য’ৰ পৰা তেওঁ অৰ্থনীতিত বিএছছি আৰু পদাৰ্থবিজ্ঞানত বিএ ডিগ্ৰী লাভ কৰে। উচ্চ শিক্ষাৰ সময়ছোৱাত, তেওঁ বিভিন্ন গৱেষণামূলক প্ৰকল্পত অংশ গ্ৰহণ কৰিছিল।
প্ৰাৰম্ভিক ব্যৱসায় আৰু সিদ্ধান্ত
১৯৯৪ চনত মাস্কে ছিলিকন ভেলীত ইন্টাৰশ্বিপ কৰিবলৈ সুযোগ পাইছিল, য’ত তেওঁ শক্তি সংৰক্ষণ আৰু ভিডিঅ’ গেম কোম্পানীত কাম কৰিছিল। ১৯৯৫ চনত, তেওঁ ষ্টেনফৰ্ড বিশ্ববিদ্যালয়ত পি এইচ ডি কৰিবলৈ সুযোগ লাভ কৰে, কিন্তু কেবল দুদিনৰ ভিতৰত সেই সিদ্ধান্ত পৰিত্যাগ কৰি ইণ্টাৰনেট উদ্যোগত মনোনিৱেশ কৰে। নেটস্কেপত চাকৰিৰ চেষ্টা বিফল হোৱাৰ পাছতো, তেওঁ নিজৰ ষ্টাৰ্টআপ আৰম্ভ কৰাৰ সিদ্ধান্ত লৈ নতুন পথ খোলে।
ইলন মাস্ক (Elon Musk) ৰ ব্যৱসায়
জিপ২: আৰম্ভণি আৰু সফলতা
১৯৯৫ চনত ইলন মাস্ক, তেওঁৰ ভাতৃ কিম্বাল মাস্ক আৰু গ্ৰেগ কৌৰীয়ে একেলগে Zip2 নামৰ ৱেব চফ্টৱেৰ কোম্পানীটো স্থাপন কৰে। ইয়াৰ বাবে মূল পুঁজিৰ যোগান দিছিল এঞ্জেল ইনভেষ্টৰসকলে। সূচনাত, তেওঁলোকে পালো আল্ট’ৰ এখন সৰু ভাড়াঘৰত কোম্পানীটো আৰম্ভ কৰিছিল। Zip2 বাতৰি কাকত প্ৰকাশন উদ্যোগৰ বাবে এক ইণ্টাৰনেট-ভিত্তিক চহৰ নিৰ্দেশিকা প্ৰস্তুত কৰিছিল, য’ত মানচিত্ৰ, দিশ-নিৰ্দেশনা, আৰু হালধীয়া পৃষ্ঠা অন্তৰ্ভুক্ত আছিল।
মাস্কৰ জীৱন সেই সময়ত যথেষ্ট কঠিন আছিল; তেওঁ ব্যক্তিগত এপাৰ্টমেণ্ট লব নোৱাৰি অফিচত শুইছিল আৰু ৱাইএমচিএত গা ধুইছিল। তেওঁ আৰু তেওঁৰ ভাতৃয়ে একে কম্পিউটাৰ ভাগ-বতৰা কৰি ব্যৱহাৰ কৰিছিল। Zip2 সফল হোৱাৰ পিছতে, নিউয়ৰ্ক টাইম্চ আৰু চিকাগো ট্ৰিবিউনৰ সৈতে বাণিজ্যিক চুক্তি লাভ কৰে।
কোম্পানীটোৰ বিকাশৰ লগে লগে পৰিচালনা সমিতিৰ মাজত মতভেদ জন্মে, আৰু মাস্ক চিইঅ’ হোৱাৰ প্ৰচেষ্টা ব্যৰ্থ হয়। ১৯৯৯ চনৰ ফেব্ৰুৱাৰীত Compaq-এ Zip2 কোম্পানীটো ৩০৭ মিলিয়ন ডলাৰত অধিগ্ৰহণ কৰে। এই বিক্ৰীৰ ফলত, মাস্কে তেওঁৰ ৭% শ্বেয়াৰৰ বাবে ২২ মিলিয়ন ডলাৰ লাভ কৰে।
এক্স.কম আৰু পেইপল
১৯৯৯ চনত, মাস্কে X.com নামৰ অনলাইন বেংকিং আৰু ই-পেমেন্ট কোম্পানী প্ৰতিষ্ঠা কৰে। কোম্পানীটোৱে আৰম্ভণিৰ কিছুদিনৰ ভিতৰতে ২ লাখৰো অধিক গ্ৰাহক লাভ কৰিছিল। যদিও মাস্ক কোম্পানীটোত নেতৃত্ব দিছিল, বিনিয়োগকাৰীসকলে তেওঁক অনভিজ্ঞ বুলি গণ্য কৰি বিল হেৰিছক নতুন চিইঅ’ হিচাপে নিযুক্তি কৰে।
২০০০ চনত, X.com Confinity নামৰ কোম্পানীটোলৈ একত্ৰিত হয়। কনফিনিটিয়ে গঢ়ি উলিয়াইছিল PayPal, যিটো ই-পেমেন্ট সেৱা হিচাপে অতি জনপ্ৰিয় হৈ পৰে। একত্ৰিত কোম্পানীটোৰ চিইঅ’ হিচাপে মাস্ক ঘূৰি আহে, কিন্তু তেওঁৰ পৰিচালনাগত সিদ্ধান্তৰ বাবে বোর্ডৰ ভিতৰত বিতৰ্ক হয়। বোর্ডে মাস্কক চিইঅ’ পদৰ পৰা আঁতৰাই পিটাৰ থিয়েলক নিযুক্তি দিয়ে।
২০০১ চনত কোম্পানীটোৰ নাম PayPal হিচাপে পৰিৱর্তন কৰা হয়। ২০০২ চনত eBay-এ ১.৫ বিলিয়ন ডলাৰত PayPal অধিগ্ৰহণ কৰে। মাস্ক তেতিয়া PayPal-ৰ সৰ্ববৃহৎ শ্বেয়াৰহোল্ডাৰ আছিল আৰু এই অধিগ্ৰহণৰ ফলত ১৭৫.৮ মিলিয়ন ডলাৰ লাভ কৰে।
২০১৭ চনত, মাস্কে X.com ডমেইনটো পুনৰ ক্ৰয় কৰে। তেওঁ কয় যে এই ডমেইনটোৰ লগত ব্যক্তিগত স্মৃতি আৰু আবেগ জড়িত আছিল।
স্পেচএক্স: ইলন মাস্কৰ মহাকাশ অভিযান
২০০১ চনত ইলন মাস্কে অলাভজনক সংগঠন ‘মংগলগ্ৰহ সমাজ’ (Mars Society) ৰ সৈতে জড়িত হৈ পৰে। তেওঁ মঙ্গল গ্ৰহত উদ্ভিদৰ বৃদ্ধিৰ বাবে এটা সৰু কৃত্ৰিম বাসগৃহ স্থাপন কৰাৰ পৰিকল্পনা কৰে। তাৰ বাবে মিছাইল ক্ৰয়ৰ লক্ষ্যৰে তেওঁ ২০০১ চনত মস্কো ভ্ৰমণ কৰে, কিন্তু ৰাছিয়ান ডিজাইনাৰসকলৰ পৰা উপহাস আৰু অৱজ্ঞাৰ সন্মুখীন হয়।
২০০২ চনত, নতুন উদ্যমেৰে মাস্কে নিজেই কম খৰচৰ মহাকাশ যান নিৰ্মাণৰ উদ্দেশ্যে স্পেচএক্স (SpaceX) প্ৰতিষ্ঠা কৰে। নিজৰ ব্যক্তিগত ধনৰ পৰা ১০০ মিলিয়ন ডলাৰ লগানি দি, তেওঁ স্পেচএক্সক উন্নত কৰে। ২০০৬ চনত প্ৰথমবাৰ ফেলকন ১ ৰকেট উৎক্ষেপণৰ চেষ্টা কৰা হয়, যদিও সফল নহয়। কিন্তু ২০০৮ চনত স্পেচএক্সে সফলভাৱে ফেলকন ১ কক্ষপথলৈ প্ৰেৰণ কৰে, যিয়ে ইতিহাস গঢ়ে।
২০১৫ চনত স্পেচএক্সে পুনৰব্যৱহাৰযোগ্য ফেলকন ৯ ৰকেটৰ সফল অৱতৰণ সম্পন্ন কৰে। ২০১৮ চনত ফেলকন হেভি উৎক্ষেপণ কৰি ইয়াত ইলন মাস্কৰ ব্যক্তিগত টেছলা ৰ’ডষ্টাৰ মহাকাশলৈ প্ৰেৰণ কৰা হয়। স্পেচএক্সে ২০২০ চনত ডেমো-২ মিছনৰ জৰিয়তে ব্যক্তিগত কোম্পানী হিচাপে প্ৰথমবাৰ মানৱবাহী মহাকাশযান কক্ষপথলৈ প্ৰেৰণ কৰে।
ইন্টাৰনেট সেৱাৰ বাবে, ২০১৫ চনত স্পেচএক্সে ষ্টাৰলিংক প্ৰকল্প আৰম্ভ কৰে। ২০১৯ চনত ৬০ টা কাৰ্যক্ষম উপগ্ৰহ সফলভাৱে উৎক্ষেপণ কৰি, কোম্পানীটোৱে বিশ্বজুৰি উচ্চ-গতিবেগী ইন্টাৰনেট প্ৰদানৰ লক্ষ্য লৈ আগবাঢ়িছে।
যদিও বিজ্ঞানীসকলে ষ্টাৰলিংকক আকাশ পর্যবেক্ষণৰ ক্ষেত্ৰত বাধা হিচাপে সমালোচনা কৰিছে, মাস্কে দাবী কৰিছে যে মহাকাশ সুবিশাল আৰু এই উপগ্ৰহসমূহ তাত কোনো ব্যাঘাত সৃষ্টি নকৰে।
স্পেচএক্সে আধুনিক মহাকাশ বিজ্ঞানৰ ক্ষেত্ৰত এক বিপ্লৱ সৃষ্টি কৰিছে, আৰু মাস্কৰ লক্ষ্য মঙ্গল গ্ৰহত বসতি স্থাপন কৰাৰ বাবে প্রযুক্তিগত বিকাশ অব্যাহত ৰাখিছে।
ছ’লাৰচিটি
২০০৬ চনত লিণ্ডন আৰু পিটাৰ ৰাইভে যুটীয়াভাৱে ছ’লাৰচিটি প্ৰতিষ্ঠা কৰিছিল, য’ত ইলন মাস্কে প্ৰাথমিক ধাৰণা আৰু বিত্তীয় সহায় আগবঢ়াইছিল। ২০১৩ চনৰ ভিতৰত ছ’লাৰচিটি আমেৰিকাৰ দ্বিতীয় সৰ্ববৃহৎ সৌৰশক্তি প্ৰদানকাৰী প্ৰতিষ্ঠান হিচাপে আত্মপ্ৰকাশ কৰে। ২০১৪ চনত মাস্কে নিউয়ৰ্কৰ বাফেলোত এটা উন্নত সৌৰশক্তি উৎপাদন কেন্দ্ৰ স্থাপনৰ পৰিকল্পনা কৰে, যিটো আমেৰিকাৰ অন্য সৌৰ প্রকল্পসমূহতকৈ তিনিগুণ ডাঙৰ। ২০১৪ চনত কাৰখানাটোৰ নিৰ্মাণ আৰম্ভ হয় আৰু ২০১৭ চনত সম্পূৰ্ণ হয়। ২০২০ চনৰ আৰম্ভণিলৈকে ছ’লাৰচিটি পেনাচনিকৰ সৈতে যৌথ উদ্যোগ হিচাপে কাম কৰিছিল। ২০১৬ চনত টেছলাই ২ বিলিয়ন ডলাৰৰ অধিক মূল্যত ছ’লাৰচিটিক অধিগ্ৰহণ কৰি ‘টেছলা এনাৰ্জী’ নামৰ শক্তি সংৰক্ষণ বিভাগৰ সৈতে একত্ৰিত কৰে।
দ্য বৰিং কোম্পানী
২০১৬ চনত ইলন মাস্কে উন্নত সুৰংগ প্ৰযুক্তি গঢ়ি তুলিবলৈ ‘দ্য বৰিং কোম্পানী’ প্ৰতিষ্ঠা কৰে। ২০১৭ চনৰ আৰম্ভণিতে কোম্পানীটোৱে স্পেচএক্সৰ প্ৰাংগণতে এটা পৰীক্ষামূলক খাদ নিৰ্মাণ আৰম্ভ কৰে, যি ৩০ ফুট বহল, ৫০ ফুট দীঘল, আৰু ১৫ ফুট গভীৰ আছিল। স্পেচএক্সৰ নিজস্ব এলেকাত নিৰ্মাণ কৰাৰ বাবে কোনো অনুমতিৰ প্ৰয়োজন নাছিল। ২০২১ চনত লাছ ভেগাছ কনভেনচন চেণ্টাৰৰ তলত এখন সম্পূৰ্ণ সুৰংগ নিৰ্মাণ কৰা হয়, যাক অধিক সম্প্রসাৰণৰ অনুমোদন দিয়া হয়।
বিপণন আৰু বিশেষ প্ৰচাৰৰ অংশ হিচাপে, ২০১৮ চনত দ্য বৰিং কোম্পানীয়ে অভিনৱ ২০০০টা ফ্লেমথ্ৰ’ৱাৰ বিক্ৰী কৰে। ইলন মাস্কৰ এই বিশেষ ধাৰণা মেল ব্ৰুকছ পৰিচালিত ১৯৮৭ চনৰ স্পেচবলছ্ ছবিখনৰ পৰা অনুপ্ৰাণিত আছিল।
ইলন মাস্ক (Elon Musk) ৰ ব্যক্তিগত জীৱন
প্ৰাৰম্ভিক জীৱন আৰু স্থানান্তৰ
ইলন মাস্ক ২০২০ চনৰ শেষলৈ কেলিফৰ্ণিয়াত বাস কৰিছিল, য’ত তেওঁ টেছলা আৰু স্পেছএক্স প্ৰতিষ্ঠা কৰিছিল। যদিও এই কোম্পানিসমূহৰ মুখ্য কাৰ্যালয় এতিয়াও কেলিফৰ্ণিয়াতে অৱস্থিত, ২০২০ চনত মাস্কে টেক্সাছলৈ স্থানান্তৰ কৰে। তেওঁৰ মতে, কেলিফোৰ্নিয়া ইয়াৰ অৰ্থনৈতিক সফলতাৰ বাবে “আত্মসন্তুষ্টি” লাভ কৰিছে।
স্বাস্থ্য আৰু নিউৰোলজিকেল অৱস্থা
২০২১ চনৰ মে’ মাহত ‘চেটাৰ্ডে নাইট লাইভ’ (SNL) অনুষ্ঠানত মাস্কে নিজেই প্ৰকাশ কৰে যে তেওঁ এছপাৰগাৰ চিনড্ৰোমত (এক বিশেষ ধৰণৰ নিউৰোলজিকেল অৱস্থা) ভুগিছে। বিবিচি নিউজে উল্লেখ কৰিছিল যে এই তথ্য মাস্কে প্ৰথমবাৰৰ বাবে জনসম্মুখত ব্যক্ত কৰিছিল।
বিবাহ, সম্পৰ্ক আৰু সন্তান
প্ৰথম বিবাহ আৰু সন্তান
ইলন মাস্কে তেওঁৰ প্ৰথম পত্নী, কানাডিয়ান লেখিকা জাষ্টিন উইলছনক কুইনছ্ বিশ্ববিদ্যালয়ত থাকোতে লগ পাইছিল। তেওঁলোকৰ বিবাহ ২০০০ চনত হৈছিল। বিবাহৰ দুবছৰৰ পিছত, ২০০২ চনত, তেওঁলোকৰ প্ৰথম পুত্ৰ নেভাডা জন্ম হয়, কিন্তু আকস্মিক শিশু মৃত্যুৰ চিনড্ৰোম (SIDS) ৰ ফলত মাত্ৰ ১০ সপ্তাহতে মৃত্যু হয়। তাৰ পিছত তেওঁলোকে আইভিএফ (IVF) পদ্ধতিৰ জৰিয়তে ২০০৪ চনত যমজ পুত্ৰ আৰু ২০০৬ চনত তিনিটা সন্তান জন্ম দিয়ে। ২০০৮ চনত তেওঁলোকৰ বিবাহ বিচ্ছেদ হয়, আৰু সন্তানসকলৰ তত্ত্বাৱধান দুয়োৱে ভগাই লয়।
২০২২ চনত মাস্কৰ এটি সন্তান তেওঁৰ লিংগ পৰিচয় পরিবর্তন কৰাৰ অনুৰোধ জনায় আৰু জৈৱিক পিতৃ মাস্কৰ সৈতে সকলো সম্পৰ্ক ছেদ কৰিবলৈ বিচাৰে।
দ্বিতীয় বিবাহ: তালুলা ৰাইলি
২০০৮ চনত মাস্কে ইংৰাজ অভিনেত্ৰী তালুলা ৰাইলিৰ সৈতে সম্পৰ্ক আৰম্ভ কৰে। তেওঁলোকৰ বিবাহ ২০১০ চনৰ ছেপ্টেম্বৰ মাহত স্কটলেণ্ডৰ ডৰ্নক কেথেড্ৰেলত হয়। কিন্তু ২০১২ চনত মাস্কে বিবাহ বিচ্ছেদৰ ঘোষণা দিয়ে। ২০১৩ চনত তেওঁলোক আকৌ পুনৰ বিবাহ পাতিছিল, যদিও ২০১৬ চনত দুয়ো চূড়ান্তভাৱে আলাদা হয়।
এম্বাৰ হাৰ্ডৰ সৈতে সম্পৰ্ক
২০১৭ চনত মাস্কে অভিনেত্ৰী এম্বাৰ হাৰ্ডৰ সৈতে সম্পৰ্কত জড়িত হৈ পৰে। যদিও জনি ডিপে অভিযোগ কৰিছিল যে হাৰ্ডে তেওঁলোকৰ বিবাহিত জীৱনৰ সময়তেও মাস্কৰ সৈতে সম্পৰ্ক ৰাখিছিল, দুয়োয়েই এই অভিযোগ অস্বীকাৰ কৰিছিল।
গ্ৰাইমছৰ সৈতে সম্পৰ্ক আৰু সন্তান
২০১৮ চনত মাস্কে কানাডিয়ান সংগীতজ্ঞ গ্ৰাইমছৰ সৈতে সম্পৰ্ক স্থাপন কৰে। ২০২০ চনৰ মে’ মাহত তেওঁলোকৰ পুত্ৰ জন্ম হয়, যাৰ নাম “X Æ A-12” দিয়া হৈছিল। কিন্তু কেলিফৰ্ণিয়াৰ নিয়ম অনুসৰি, ইংৰাজী বৰ্ণমালাৰ বাহিৰৰ আখৰ ব্যৱহাৰ কৰা নিষিদ্ধ আছিল, গতিকে নামটো “X AE A-XII” হিচাপে সলনি কৰা হয়।
২০২১ চনৰ ছেপ্টেম্বৰ মাহত মাস্কে ঘোষণা কৰে যে তেওঁলোকে “অৰ্ধ-বিচ্ছিন্ন” অৱস্থাত আছে। ২০২১ চনৰ ডিচেম্বৰ মাহত, গ্ৰাইমছে তেওঁলোকৰ কন্যা সন্তান জন্ম দিয়া কথা প্ৰকাশ কৰে, যাৰ নাম “Exa Dark Sideræl Musk”। যদিও ২০২২ চনৰ মাৰ্চ মাহত, গ্ৰাইমছে টুইটযোগে ঘোষণা কৰে যে তেওঁলোকে পুনৰ বিচ্ছেদ ঘটাইছে, কিন্তু মাস্ক তেওঁৰ “শ্ৰেষ্ঠ বন্ধু” আৰু “জীৱনৰ প্ৰেম” বুলি অভিহিত কৰে।
উপসংহাৰ | Conclusion
ইলন মাস্ক এক বিস্ময়কৰ উদ্যোগী যিজনে বিশ্বৰ বিজ্ঞান, প্ৰযুক্তি আৰু ব্যৱসায়ৰ ক্ষেত্ৰত অভূতপূৰ্ব পৰিবৰ্তন আনিছে। তেওঁৰ সৃষ্টিশীল চিন্তা, কঠোৰ পৰিশ্ৰম, আৰু উচ্চাকাংক্ষা তেওঁক টেছলা, স্পেচএক্স, নিউৰালিঙ্ক, আৰু দ্য ব’ৰিং কোম্পানীৰ দৰে বিশ্ব-প্ৰসিদ্ধ কোম্পানীৰ নেতৃত্বলৈ লৈ গ’ল। তেওঁলোকৰ লক্ষ্য হৈছে মানৱসভ্যতাৰ অগ্ৰগতি নিশ্চিত কৰা, টেকসই শক্তি প্ৰচাৰ কৰা, আৰু মহাকাশ অভিযানৰ দ্বাৰা পৃথিৱীৰ সীমা অতিক্ৰম কৰা। ইলন মাস্কৰ জীৱন আৰু কৰ্ম নতুন প্ৰজন্মৰ উদ্যোগীসকলৰ বাবে অনুপ্ৰেৰণা স্বৰূপ।
FAQs
1. ইলন মাস্ক কোন?
A: ইলন মাস্ক এজন খ্যাতনামা উদ্যোগী, উদ্ভাৱক, আৰু বিলিয়নেৰ যিজনে টেছলা, স্পেচএক্স, নিউৰালিঙ্ক, আৰু দ্য ব’ৰিং কোম্পানীৰ দৰে বৃহৎ প্রতিষ্ঠান প্ৰতিষ্ঠা কৰিছে।
2. ইলন মাস্কৰ মূল লক্ষ্য কি?
A: তেওঁৰ লক্ষ্য হৈছে টেকসই শক্তি উন্নয়ন, মঙ্গল গ্ৰহত বসতি স্থাপন, আৰু মানৱসভ্যতাৰ উন্নতি নিশ্চিত কৰা।
3. ইলন মাস্ক কেনেকৈ কোটিপতি হ’ল?
A: তেওঁ Zip2 আৰু PayPal বিক্ৰীৰ পিছতে বিশাল ধন উপাৰ্জন কৰে, যাৰ পাছত টেছলা, স্পেচএক্স, আৰু অন্যান্য উচ্চ-প্ৰযুক্তি কোম্পানীৰ লগত জড়িত হয়।
4. ইলন মাস্কৰ গুৰুত্বপূৰ্ণ সফলতা কি?
A: তেওঁ টেছলা গাড়ী উদ্যোগক বৈদ্যুতিক বাহনৰ নেতা হিচাপে পৰিণত কৰে, স্পেচএক্সৰ যোগেদি মহাকাশ অভিযানে বিপ্লৱ সাধন কৰে, আৰু নিউৰালিঙ্কৰ সহায়ত মগজু-কম্পিউটাৰ ইন্টাৰফেছৰ বিকাশ ঘটাইছে।
5. ইলন মাস্কৰ ভবিষ্যৎ পৰিকল্পনা কি?
A: তেওঁৰ লক্ষ্য হৈছে মানুহক মঙ্গল গ্ৰহলৈ পঠিয়াই তাত বসতি স্থাপন কৰা, পূৰ্বৰ তুলনাত অধিক উন্নত কৃত্ৰিম বুদ্ধিমত্তা প্ৰস্তুত কৰা, আৰু টেকসই শক্তিৰ ব্যৱহাৰ বঢ়োৱা।
Read also: Bill Gates Biography | বিল গেট্ছৰ জীৱনী
My self Mahezubin Saikia. Working in Dev Library as a Content Writer. A website that provides all SCERT, NCERT 3 to 12, and BA, B.com, B.Sc, and Computer Science with Post Graduate Notes & Suggestions, Novel, eBooks, Health, Finance, Biography, Quotes, Study Materials, and more.
